المطيوره
04-04-2006, 10:17 PM
في هذا العصر الكل يطالب بالديمقراطيه وابدا الراي بكل حريه او القيام باعمالهم بكل حريه
وبدون قيود او حدود تمنعهم من القيام بها فمن منا لايطالب بها فمثلا ابوي يطالب بها في عمله
ومجتمعنا لكن لايطبقها في المنزل ويفرض علينا احكام وقوانين صارمه وكاننا نعيش
في معسكر او منطقه تجنيديه فيبدا يومنا من صلاة الفجر وينتهي بالساعه الحاديه عشر وفي
المناسبات الساعه الثانيه عشر ولايستطيع احدمنا المخالفه او البوح بعدم الرضى او السخط من
تلك القوانين فلماذا هو يطالب بالديمقراطيه وهو لايطبقها معنا نحن الذين تحت امرته
وفي المدرسه والجامعه ايضا لايمارسون الديمقراطيه ولكن يطالبون بها فاذا اعترضنا على
نظام معين او طريقة شرح معينه اتهموننا بالمتخاذلات وقالو هذا هو النظام والقوانين اذن لماذا
تطالبون بالديمقراطيه وفي هذا المنتدى ايضا يطالبون بها ولكن لاتطبق بحذافيرها فاذا احد
الاعضاء ابدا رايه في احد الامور او المواضيع نجد الكل يثور ويجول في عقولهم اشياء ليس لها
شي من الصحه اذان فنحن جميعا نطالب بشي لانطبقه في انفسنا فنحن لانستطيع ان نكون
ديمقراطيين اذا لم نغير من انفسنا اولا لنتحرر من الدكتاتوريه وليكن هدفنا ارضا انفسنا ثم
ارضا الغير .
مقدمتي كانت مجرد فلسفه من ماتعلمته من هذه الحياه اتمنى ان تحوز على رضاكم
ابدا قصتي من مدرستنا الثانويه قبل ان التحق بالجامعه وهذه القصه مجرد خيال لم تحدث في
الحقيقه لكن يوجد بها بعض الوقائع الممزوجه بالخيال
ابوي : يلا كل واحد في غرفته ولا اشوف نور مولع بالبيت الساعــــ 11 ــــه مساء تصبحون
على خير وراكم دوامات
مط مط : وانت من اهله ابوي طبعا لايخلو الامر من بوسه لارضا غرور اخو نوره وبوسه لاحلى ام
بالدنيا اخت فتحي
رحت فراشي وجلست افكر وافكر مافيني نوم بس لازم انام امر عسكري وتلقيته واتقلب واتقلب
واتذكر ام كلثوم وهي تقول اتقلب على جمر النار اظن كذا كانت تغني المهم وربي يرحمني
ويغطني النوم وانام نومه حلوه بس قبل الفجر بقليل وعلى غير عاده اصحى قبل الكل على
ذاك الكابوس واحاول ارجع انام بس وين الحين مستحيل لان الكابوس صار قدام عيوني صرت
افكر فيه وماقدرت انام جت امي للغرفه وتصحيني قلت اصلا ماني نايمه ياامي قالت :ليه وش
فيك عسا منتي تعبانه قلت : امي تكفين لاتخليني تكفين ياامي انا احس احساس غريب شكلي
بموت ياامي امي : بسم االله عليك هذي خرابيط ابليس يلعب بعقلك قومي تعوذي منه وصلي
سمعت كلام امي بس الاحساس كل دقيقه ودقيقه يكبر ويكبر لين صرت احس بالجنون منه
انا:امي مابي اروح المدرسه تكفين ابي اجلس معك اخاف اموت وانا بعيده عنك تكفين ياامي
واللي يخلي لك امك وحالتي حاله بس ابكي امي : حركات البنات ماتمر علي بتروحين للمدرسه
يعني تروحين مانيب ناقصه هذر ابوكي وهواشه انتي اللي مخربه البنت وانتي وانتي روحي
الله يهديكي انا: وكلي احساس بقرب المنيه طب بروح بس تكفين امي سامحيني اذا يوم زعلتك
واذا مت استسمحيلي من كل اللي اعرفهم من جماعتنا وخصوصا اللي زعلتهم مني وكنت ا
اسوي فيهم مقالب الله يخليكي امي هذي وصيتي . امي: وهي تضحك ضحكة خوف ايه يصير
خير بس روحي عمك ومس مس ينتظرون قبل ماطلع من البيت مسكت امي يدي وقالت:انتبهي
لنفسك وتعوذي من ابليس حضنت امي بقوه وجلست ابكي سلمي على ابوي امانه وخليه
يسامحني واخواني بعد وودعت امي وانا متاكد اني ماراح اشوفها .
وحنا بالطريق جالسه ابكي بالسياره ومس مس تقول وش فيك قلت بس مزكومه قال
عمي :سلامتك يابنتي قلت: الله يسلمك عمي تكفى سامحني اذا يوم زعلتك قال : وهو يضحك
لا مانيب مسامحك خخخخخخخخ قلت : تكفى عمي سامحني الله يخليك انا حاسه اني بموت
قال عمي :كلنا بنموت وانا عمك اهم شي وش سوينا سوينا خير والا لا هو قال سوينا خير والا
لا بدت تدندن براسي خير وش سويت انا من خير بالدنيا واجلس ابكي وابكي المهم وصلنا
للمدرسه وننزل مس مس :وش ذا يامط مط من جدك تبكين وش صاير احد زعلك احد مضايقك
انا:وانا اشاهق لا ماحد زعلني بس عندي احساس اني بموت مس مس احبك تكفين سامحيني
ترى مالي غيرك مس مس وهات يابكا انا ومس مس والبنات يتجمعون علينا وش فيكم وش صار
عسى ماشر قلت :للشله حقتنا ابد احس اني بموت والبنات منهبلات وش فيها ذي قالت دانه
صديقتي :هبله انتي كلنا بنموت وماحد يدري متى بيموت لو ندري كان علوم قلت :لا انا حاسه
واحساسي مايخيبني حتى اسالو مس مس قالت مس مس:وجع الا بذا لاتقولين كذا احساسك بهذا
الشي خطا صدقيني مط مط لاتقولين كذا ترى بزعل وهي تبكي وميته صياح معي واستسمح
من شلتنا وكل وحده اجلس اتسامح منها بس كيف استسمح من البنات والمديره والمدرسات
ياربيه وش اسوي ابي حل لازم حل لازم اقولهم يسامحوني قبل مااموت واتذكر مس مس واجيها
وهي تستعد للاذاعه مس مس لك والا لذئب قالت :يخسى الذئب وش تبين امري يابعدهم ماقدر ارد
لك طلب كيف عاد وانتي بتموتين قلت :ابي استلف منك دورك بالاذاعه قالت وشو ليه قلت العلم
اللي جاكي قالت ليه واصلا انتي ماتحبين تشتركين بالاذاعه من وحنا صغار وش غير رايك
قلت تكفين مس مس لاتناقشين قالت خلاص لكي اللي تبين كم عندي مط مط كل هذا الكلام
وماغير من شعوري شي ابكي وكل ماشفت وحده استسمحها واناظر يمين وشمال واودع كل
الاماكن المهم واخذ اليوم الاذاعه والكل منذهلين هذي اللي ماتحب الاذاعه وش فيها جايه
وواقفه جنب المايك وانا انسف دموعي وابدا
بديت الاذاعه وقلت لهم اخواتي الطالبات المهويات معلماتي الفاصلات المديره المستديره والكل
يناظرني بحقد وتجي الهبله حقة الاذاعه بتسحب مني المايك قلت اصبري بقول كل اللي
بنفسي قبل ماموت لاني اليوم انا واقفه هنا وابي اقولكم تسامحوني عن كل شي كنت اقوله
بوجهكم وقفاكم عطوني فرصه اهرج وبعدين سووو اللي تبونه قالت ابله عواصف يوووه
قصدي عواطف خلوها تقول اللي تبي المهم قلت المقدمه اللي قلتها تو من مهاويات وفاصلات
ومستديره كنت كل مابديتو اذاعه اقولها قبل ماتقولونه واضحك انا وشلتنا وابله عواطف دايم
تقولنا ليه تضحكون عرفتي السبب ابله عواطف وازيدك من الشعر بيت مسمينك عواصف وهذا
الشي موب مقتصر عليكي الا كل مدرسه لها اسمها ابله منقله اللي هي مدرسة الرياضيات وابله
مخرفين انتي طبعا ابله نرمين وابله مراطيس ابلة الطبخ وابله وهذا موب على المدرسات بس
حتى البنات ومس مس تجيني طايره بس يامط مط وش تسوين دهورتي مستقبلنا قلت انا بموت
خليني اقولهم عشان يسامحون قالت مس مس لو سامحوكي هم انا ماراح اسامحك انا والشله
بكذا راح تدهورين مستقبلنا وانتي تقولين بموت انتي موتي بدون اي ضرر لنا انا لمس مس
خليني مس مس اذا لي معزه المهم واكمل وماخليت وحده الا وقلت لها وش كنا نقول عنها
وتصرخ وحده من الشله تقول بسسسسس كفايه حرام عليك قلت وبعد مابينت لكم وش كنت انا
وشلتي شلة الانس نقول عليكم وش نحش فيكم ابيكم تسامحوني تكفون سامحوني قولولي
انكم سامحتوني الله يخليكم انا بموت تكفون حاسه يومي قريب وانا بهم والعالم بهم كيف
ينتقمون مني انا وشلتي اللي صارت اوراقنا مكشوفه وشلتي تفكر كيف تدافع عن نفسها
بعد ماحطيتهم قدام الامر الواقع وورطتهم وانا ماعندي ماعند جدة ابوي وارجع لمكاني
بالطابور والبنات يقرصون فيني وانا اقول القرص بالميت حرام
دخلنا فصولنا وتدخل علينا مدرسة الدين وبعد ماسلمت قالت مط مط وش سويتي اليوم الله
يهديكي تدرين ان الكلام اللي قليته بيوديكي بداهيه انتي وشلتك قلت انا خلاص ابي اقول
الحقيقه عشان الناس تسامحني اخاف اقابل ربي وانا حاشه بذي وذابه علي ذي ابي كل اللي
يعرفوني يسامحوني قالت:وانتي وش يخليكي تقولين كذا الله يهديكي انا شفت حلم وحسيت
انه بيتحقق لاني اذا شفت حلم يتحقق مدري ليه المهم جلست تنصح وتهرج وتهذر وانا اصلا
خلقه ابكي وزادتني بدون ماتدري وتخلص الحصص الاولى اللي هي ثلاث حصص وانا اصلا
مافهمت شي ومس مس تحاول بس مافيه امل المهم تبدا وقت الفسحه انتم تقولون فسحه والا وش
تقولون لها يعني وقت بلع السندوتشات وجميع ماقدرك الله على تعاطيه في ذاك الوقت حبوب
اي شي حبوب راس يعني اذا مصدع وتفكر بالموت زي حالتي والدنيا برد مره قالت مس
مس:خلنا نطلع بالساحه اللي برى عشان تغييرين مكان موب نفس مكاننا بالساحه الداخليه
قلت:مايفرق معي اصلا خلاص كله زي بعضه اهم شي انتم وش تبون قالو البنات كلهم لابنطلع
برى احسن حتى مافيه بنات كثير لاننا صرنا نحس البنات يناظروننا بحقد موب طبيعي وشكلهم
اخر الفسحه بيصفقوننا قلت انا بتفاهم معهم قالو ليتك تسكتين بس لاتصير اخرتك على
يديننا قلت لاتستعجلون هي جايه جايه مير منكم يمكن تهون وجلسو يسولفون وينكتون يبون
انسى قالو شوفي البجعه جايه هنا وش تبي ذي ووحده من الشله تقول تقهر ذا البجعه شايفه
نفسها وانا اقول استغفرو ربكم حرام البنت ماسوت لنا شي المهم كان هواء قوي مره اعظم
البنات اللي كانو برى دخلو بقت شلتنا وشلة كم بنت المهم الا البواب داخل علينا ونصرخ
ونصيح انا ومس مس ووحده من شلة البنات الثانيات وكم بنت بعيدين تجمدنا من الخوف الا ذاك
الرجال لابس ثوب رمادي ويجري جهتنا ومتلطم وجاي يجري علي ومعه بندقيه طويله انا احس
الدنيا تدور فيني ومتجه لمى قلت ياويلي عزالله رحتي طعام جحوش واستسلم لامري الواقع
واقف واستشهد قال :من وين اروح واشر له على الدوران الخلفي للمدرسه ويتعداني ويروح
لمه وانا استانس قلت : الحمد لله وتجي الشرطه وتصير المدرسه حوسه قالو هذا ارهابي وحنا
نلاحقه وربكم حميد كنت انا وشلتي ذاك اليوم متفقين نلبس شالات طويله وانا كنت لابسه واحد
ازرق احب اللون الازرق ومن ذاك اليوم حبيته اكثر واكثر والفه على راسي ويجي الضابط لمي
قال وين راح قولي لاتخافين ياختي قلت لدوران الخلفي للمدرسه ومادرينا الا يطل علينا من
سطوح المدرسه قاله الضابط انزل والا ترى بنطلق عليك النار قال :ماني نازل الا معي رهينه
وانا متنحه فيهم اتفرج احب اشوف الحدث اول باول ومس مس طبعا والشله متنحين معي نحب
العلوم نبي بعدين ننشرها بكل مصداقيه قال :الضابط بعد ارهابي ويتشرط قال :لو ماترسلون
رهينه افجر المدرسه وهو قالها والضابط تغير علومه
قال:الضابط برسل لك واحد من العسكر قال الارهابي :لا ماتمشي علي هذي الحركات ابي
وحده من البنات وحنا سمعنا ذا الكلام وكل وحده تبي تحط رجلها ونسينا جمع العلوم والوقايع
والمصداقيه قال الضابط :خلاص ويلتفت لينه يشوف بنت انا مسميتها دايره شنو قال :اطلعي
ياختي ترى شوي وترجعين قالت له :لو تقطع راسي ماطلعت له قال الارهابي :لامابي ذي ابي
غيرها قلت انا بخاطري :وجع بعد تتشرط انت ووجهك قال:ابي ام ايشارب ازرق قلت:هلا والله
بعد تحدد الوان نسيت ان ايشاربي ازرق من الخوف قال الضابط:لي روحي ياختي اطلعي لم
الارهابي واقنعيه ينزل معك قلت :لا تكفى عمي الضابط لاتخليني اطلع قال :هذا واجب وطني
وانا عمك روحي قلت لاتكفى الله يخليك الله يخلي عيالك الله يخلي لك حرمتك الله يرحم امك
الله وماخليت دعوه الا دعيتها له وهو مصر واجلس اصيح وافكر بطريقه تخلصني من الورطه
وتطري علي فكره قلت شوف موب التجنيد الاجباري ماياخذون اللي وحيد عند اهله قال
الضابط :ايه قلت خلاص انا وحيدة امي ماعندها بنت غيري حتى اسال بنت عمي مس مس صح
مس مس قالت مس مس :صح بس امك منغثه منك يمكن يصير شي عادي عندها انك تصيرين فدا
للوطن قلت امحق بنت عم والله امي تبيني تكفى عمي الضابط الله يخليك الله ينجحك
قال اقول اطلعي لافرغ المسدس براسك الملعون ابو كرش كبيره كانها كرش جورج الغامدي
غصبني يعني تنفيذ اجباري امر عسكري وينفذ بكل حذافيره قلت وينكم ووين الديمقراطيه
يامال العله سعوديين وعرب الله لايهنيكم بالدنيا بعدي وطلعت مع سلم النجاه اللي طلع معه
الارهابي وانا اوصي مس مس انها تسلم على امي وتسلم على اهلي كلهم وتقولهم اني مت فدا
للوطن ويكتبونها بالتاريخ حق سادس عشان كل البزران يعرفون اني بطله واطلع وقبل ماوصل
بشوي قلت مس مس امانه معك روحي لغرفتي وافتحي جهازي وامسحي كل الصور وامسحي
الكوكيز تكفين بنت عمي قالت الصور اعرف احذفها بس الكوكيز وشلون قلت بعدين اعلمك
عساكي العله لازم كل شي اعلكم عليه والا تدرين خلي المربوشه تسوي لجهازي فورمات
احسن عشان السريه بس والله جهازي مافيه شي بس الاحتياط واجب يمكن احد داز لي فيروس
شي والا مرسلين لي صور بدون مدري (( نصب ))
ووصلت للارهابي وانا استشهد واقرا كل صور القران اللي اعرفها مع اني حست بعضها على
بعض اجيب ايه من هنا وايه من هناك والله من الخوف اللي صايبني ومادريت الا الارهابي يمد
يده يقول هاتي اساعدك قلت تبي تساعدني خلني انزل الله يخليك انا مسكينه وامي ماعندها
غيري تكفى الله يخليك لاتموتني الله يدخلك الجنه الله ينجحك الله يوفقك في كل شي تربو
نفسك له ويجلس يناظرني ويضحك ويقول:تصدقين تنفعين شحاده عند باب الحرم كل ذي
دعوات ماخلصت دعواتك تحت جيتي تدعين عندي بعد ناظرته وعيوني مليانه دموع وقلت :طب
لاتذبحني قال :يابنت الحلال انا ماني ارهابي ويفك اللطمه وياويلي يوم فكها كانه فاتح لي
باب من ابواب الجنه قلت:وش انت اجل قال:يابنت الحلال ابو كرش ذا اللي تقول انها كرش جورج
الغامدي شافني وانا ببلكونت بيتنا ومعي الساكتون ذا واصوب على علبة بيبسي حاطها
بالشارع قال بس ارهابي وهو طردي ورايه من شارع لشارع ومن حاره لحاره قاطعته
وقلت :وانت ليه تسوي كذا وتجيب لك الشبهات ماتدري ان الشرطه عندنا مع الخيل ياشقرا لو
يشوفون معك نبيطه قالو بس ارهابي هذا كله وانا اتامل وسامته عسا المنتدى يفداه والدنيا
كلها تفدا جماله وجمال سكسوكته ورموشي تبدا تخبط فوق تحت قال :يابنت الحلال هذا الطفش
تخيلي انا متخرج من الجامعه وبتقدير امتياز ومالقيت لي وظيفه ومن الطفش قلت اتعلم الرمايه
تدرين ماعندنا معاهد متخصصه بهذا المجال وكل شي حرام على العزوبي يدخله ملاهي منتزه
سوق اي شي محرم علينا الا برفقت وحده معنا وانا من وين اجيب وحده ترافقني كل مكان
اروح له قلت :وانا رحت وين هذا بخاطري طبعا الله ياخذ اللي ماترافقك والله ارافقك لو لابو
زعبل اهم شي معك ووين مايروح الاخضر انا وياه وهو يكمل كلامه عن العزوبيه والعالم اللي
تحت تنتظر اخر المحاوره اللي بيني وبينه وعلى بالهم انه الحين بيذبحني مادرو اني انذبحت
من جماله وينادينا الضابط ويقاطعنا الله يقطع عمره ويعجل اجله ويقص روحه قال:هيه
يارهابي وين رحت وش سويت بالبنت قال الولد :تكفين يابنت الاجواد ابيكي تهربيني انتي
اول مره انقذتي حياتي يوم دليتيني على الدرج الخلفي قلت :انا متى قال اول مادخلت
اشرتيلي بيدك وانا رحت ولقيت الدرج وطلعت منه للسطوح قلت ايه انا اشرت بس والله من
الخوف قال :طب تقدرين تدليني على مخرج انحاش منه لايمسكوني قلت:بس تبي ادلك
مكان تتخبى به ماتبي ادلك بيت اهلي بعد قال:تتريقين قلت لاوربي بس استهبل قلت عندي
والله مكان بس اخاف مايعجبك قال:اي مكان بيعجبني ولا كرش ذا الملعون اللي تحت نشف
ريقي الله ينشف دمه بعروقه عساه الساحق الماحق قلت امين يارب المهم دليته من وين ينزل من
الدرج الرئيسي ويتجه الى الحمام المهجور الله يعزكم ويجلس فيه لين اشوف له صرفه قالي
انتي متاكده ان ماحد يجيه قلت اصلا ماحد ينتبه ان فيه حمام من كثر موب مهجور راح يتخبى
وانا نزلت من الدرج حق الطواري
نزلت وانا اغني ياي سحر عيونو نظارتو اول ماتلائينا عين بعين ياي شو مهضومه كلماتو ذبت
بكلمه كيف لو كانو تنين كلمه وصار البي بكلمه نار على نار بسمه على بسمه البي احتار
نساني اسمي مدري كيف هواي مدري كيف هواي وعيوني تروح يمين ويسار وانفش بشعري
عبالي اني حلوووه والا يقاطعني ابو كرش كانها كرش جورج الغامدي قال اين الرجال <<<<
جنوبي ترى قلت له مدري طلعت وجلس يهرج ويهدد واختفى تقول انه بسم الله الرحمن
الرحيم قال :انتي صاحيه قلت له وش تشوف ياعسكري خربت اخلاقي معه طلع عسكري وانا
احسبه ضابط قلت الرجال اختفى وانا رجعت بالسلامه قال :ايش نبغى فيش قلت فيش والا محول
اهم شي رجعت وانطم رح دوره يالخواف اجل مرسلني للارهابي وانت جالس تناظرني انت
ووجهك والله لارفع عليك دعوى واقول انك ضحيت بوحده من الطالبات واي طالبه مط مط بنت
اخو نوره مرسلني لواحد عشان يذبحني وانت مندس هنا بين المدرسات يالخبل واستلمه هواش
المهم اني خليته ينسى اسمه من كثر هواشي له ورجعت للبنات وهم فرحانين ويهنوني
بسلامتي قالو لي :وش صار لك فوق انتي متغيره 180 درجه قلت لو شوفتو اللي شفته
يااااااااااااااااااااي سحر عيونو نظراتو يااااااااااااي شووووو مهضومه كلماتووو ويقاطعني الله
يقطعه ذا الغبي العسكري قال :انتي ماشفتي من اين راح الرجال قلت:قول امين الله يعطيك
مايذيك انت وراك علي خلني بحالي خلاص انقلع ياعسكر تبون الحقيقه هو وده يدوره بس
خايف الجبان ويبيني ادوره له معصي افتن على صديقي ايه ليه مستغربين صار صديقي موب
انا انقذته المهم وارجع لصديقاتي واسولف معهم واعلمهم عنه وكلهم منبهرات باللي اقوله
وطاح من نظرهم الخبل العسكري قالو طب هو وين الحين ذا الارهابي قلت مدري ماعرف عنه
شي قالي انه موب ارهابي واختفى مدري وين راح ايه تدرون انا مابي افتن عليه لاني ناويه
اساعده للنهايه وخفت تكون فيه وحده جاسوسه وتعلم عليه حرام
بعد ساعه امر الضابط باخلا المدرسه وتوجهنا يالطالبات ناخذ اغراضنا والمدرسات طبعا وانا
سويت ان عبايتي ضايعه ورحت لام حسن الخاله اللي بالمدرسه قلت لها عندك عبايه انا عبايتي
ضاعت مع ذا الزحمه قالت ماعندي الا عبايه بس ماتنفع لك كبيره وبعدين ترى وسخه قلت اي
شي بس اهم شي يستر قالت خلاص خذي الا معطتي خيمه موب عبايه وفوق كذا مغبره بشكل
فضيع تحسون انها جايبتها من البر موب من دولاب المفقودات اخذتها وتوجهت للحمام
المهجور الله يعزكم ومس مس تدور علي عشان نطلع مع بعض قلت لها بعدين اجيك عند الباب
راحت بنت عمي وكلها استغراب من تصرفاتي ورحت ولقيت الارهابي ترى موب ارهابي
وعطيته العبايه وطلعته من وسط الزحمه برى المدرسه ولو تشوفون شكله بالعبايه تضحكون
ماقول الا ياشين الرجال بالعباة شكله تحفه يموووووت ضحك صاير كانه حرمه عفشه ودفشه
وهبله ومشيه يضحك لا والرجول اللي باينه كوم بس زين ماحد انتبه له من الخوف والزحمه وهو
راح بحال سبيله وانا اكلتها بس افكر فيه وفي نظراته وكلامه المرتب وصرت افكر وافكر المهم
واحنا ننتظر السياره صارحت مس مس ماقدر اخبي عنها شي قالت يامجنونه افرضي انه
ارهابي صدق وضحك عليكي بالكلام ذا وش يكون موقفك من وطنك ودينك وعروبتك
وتستلمني كانها فيصل حق الجزيره حق برنامج فيس تو فيس قلت لها ليتك تسكتين وربي لو
تشوفينه موب تهربينه الا تروحين تفجرين الفيصليه عشانه سبحان من صوره مس مس بقولك
شي بس ابيكي تسمعيني للنهايه قالت يلا انا كلي اذان صاغيه قلت لها : عايزه احس احساس
جديد انسى الدنيا واعيش بعيد واغير حياتي مادريت الا بالشنطه على راسي قالت خير وش
تبين ياهيفاء وهبي بنت عمي اسكتي وضبطي حالك لاضبطك وانا اسكت واجلس ادندن بيني
وبين نفسي ياااااي سحر عيونو كلماتووو وهي تناظرني بنظرات كلها ازدرا وتقول الحمد لله
والشكر هذي اللي الصبح بتموت وصاجتنا بموت وسامحوني الحين مسويه رومنصيه الله يخلف
على عمي وزوجته ابك هذي بنت والا مخفه انضحك عليها ومصدقه نفسها انها تحب وليته واحد
زي الاوادم ارهابي ياشماتت ابلا تازه فينا وفي جماعتنا وجت السياره ورحنا لبيوتنا
وادخل البيت واسلم عليهم واحضن امي بقوه واقولها احببببببببببببك ياحلى ام قالت :وشلونك
وش سويتي بالمدرسه قلت بقولك كل شي يامي ياحلا ام بس ابدل ملابسي واجي ونزلت لامي
اسرع من البرق واجلس اقولها كل شي سويته من اول ماجيت لين طلعت من المدرسه وامي
ساكته تسمع هذا احلى شي بامي تسمع لك لين تخلص وبعدين تسالك وتتحاور معك بكل
هدوء حتى لو الشي موب عاجبها ويومني خلصت قالت زين ممكن اسالك قلت طبعا قالت اول
شي وش جاب طاري الموت عليكي قلت لها ياامي انا حلمت حلم ان فيه ملاك اخذني من بين
صديقات ومدرساتي وطار فيني للسماء يووووووووووووووه تصدقين ياامي انه هو الارهابي
والله هو تفسير الحلم قالت لي وهي ميته ضحك طيب هذا حلمك فسرتيه طيب سؤال ثاني
قلت اسال ياقميل قالت انتي ليه ساعدتي الارهابي قلت عجبني واقنعني انه موب ارهابي
اصلا ياامي لو تشوفينه موب ارهابي والله ياامي رقيق وحبوب والبراءه تشع من عيونه شع
شع قالت طيب انتي الحين تفكرين فيه صح وتحسين انه فارس احلامك صح قلت لامي وليه
الاحراج مامي قالت بس يابنتي ترى بعض الاحيان الانسان يحس باشياء ميب واقعيه ويمكن
يخونه احساسه تذكرين يوم كنتي معجبه بذاك المذيع الاجنبي لحد انك كنت تتابعين
برنامجه وانتي موب فاهمه شي قلت امي ووع هذاك غير كان فترة هبال مني اجل اعجب
بمسيحي قالت طب لاتفكرين بذا كثير خلي الامر يمشي عادي انا عارفه وانا امك انك راح
تفكرين بس اتمنى تفكيرك مايتعدا الموقف اللي مريتي فيه ولا تبنين عليه احلام وامال ماراح
تتحقق وفكري انك عشتي تجربه غريبه كانك بملاهي بس لاتطورين الفكره براسك وانا امك
بعدين تتعبين وانا مايهمني بالدنيا غير مصلحتك لانك بنتي الوحيده واي شي يصير اعرف انك
بتقولينه لي قلت لها اكيد امي اصلا من وانا صغيره اي شي يصير اقوله بكل صراحه لاني احس
انك معي بكل وقت وقمت من عند امي ورحت ارتاح شوي وافكر بكلامها اللي كله صح بصح
يابعدهم يامي مدري وش حياتي بتكون بدونك الله لايحرمني منك
بكذب عليكم لو قلت لكم اني ماكنت افكر في الارهابي اللي موب ارهابي افكر في كلامه
وفي شكله في كل شي صار المهم تعبت من التفكير ونمت واصحى على صوت اخوي يقول
قومي امي تقولك انزلي لها بيجيها حريم قلت طيب بعد ماصحيت وكشخت وكل شي طلعت من
غرفتي الا اخوي بالصاله قال هلا بالفدائيه قلت وش تبي انت قال احلا شفتي نفسك علينا يوم
صرتي فدائيه قلت لافدائيه ولا ارهابيه قال انا الحين مفتخر فيكي يااختي قلت طيب وش تبي
<<<< اخلاق مع اخوانها قال يامال المرض تعالي حكيني مافيه زيك بسرد العلوم قلت موب
الحين بشوف امي وانزل وينزل معي قالت امي مابعد جو الحريم قال زين يلا عشان تحكيني
قلت طب انت وش عرفك قال اخو مس مس قالي وبعدين سالت امي قالت ايه اذا قامت هي
تقولك اللي تبي تعرفه والحين ممكن تتلطفي وتتفضلي وتهزي طولك وتقولين لي وش السالفه
ناظرته بنص عين قلت له الحكايه من الاول الا الاخير قال هربتيه قلت ايه مسكين موب ارهابي
قال ياخوفي منك تقدرين تسوين كل شي قالت اسكت بس شوي الا الاخ الاكبر يدخل علينا
ونستمله انا واخوي الصغير قلنا هلا بصاحب الشركات هلا بالاموال المتحركه هلا بالاداره هلا
باللي يبي يصير وليد المستقبل تراه يدرس ادارة اعمال وحنا بس تريقه عليه وعلى قسمه
مسوي تاجر الخبل وعلى مين علينا ويتكلم بالاقتصاد وكيف تديرون اعمالكم ومن هالخرابيط
يعني بالعربي غاثنا قال انطموو الا تعالو مادريتو فيه مدرسه بالرياض للبنات دخلها ارهابي
كل الناس تهرج بالجامعه قلت قديمه ناظرني الصغير عساه مايكبر قولي له ياليمه <<< ولعت
طب يابهيمه وحكيناه السالفه ويستلموني تريقه وخرابيط يام الارهابي ياللي تهرب ارهابي
بكره بنشوف الاستخبارات عند بيتنا تدورك ياويلك وانا ساكته اتبع المثل اللي يقول الحقران
يقطع المصران واساعد امي وماتكلم معهم ويخلص اليوم باليوميات المعهوده بكل بيت بتسالون
عن ابوي ابوي ترى بس يلقي اوامر وحنا ننفذ وغالبا بشغله وبعدين بديوانيتة يعني مانشوف
الا اذا يبي يهاوش او يعطي اوامر جديده او باللفه الاخيره قبل النوم بس
صحيت الصباح ورحت للمدرسه ويوم دخلت انا ومس مس الا الشله جايه قالت مادريتو مافيه اذاعه
اليوم قلنا ليه خير انشاء الله قالو المديره بتلقي كلمه قالت مس مس اللي خفت منه صار كله منك
ياللي بتموتين ضيعتي مستقبلنا قالو كل البنات ايوا الله يامط مط مستقبلنا ضاع والسبه انتي
الله ياخذك قلت انا بتصرف ماعليكم قالو ماودانا بداهيه الا تصرفاتك حسبي الله عليك وانا
ساكته حاسه بالذنب يعني لو مصبره شوي كان عرفت تفسير حلمي بدل ماحوس الدنيا صدق
اني مطيوره اسم على مسمى مادريت الا مس مس تشد يدي وتاخذني على طرف قالت وش
سويتي قلت في ايش في الارهابي قلت طبخته واكلته انتي تدرين وش سويت بلا بلاهه بس
قالت الله يستر بس لايصير لنا شي والسبه انتي قالت انا بروح اشوف مدرسة الاذاعه وش عند
المديره واجيبكم وننتظر مس مس وماجت المهم صفينا بالطابور الا مس مس تطلع قالت جملتها
المعهوده وانا ودي اضحك بس امس معترفه بكل شي يكفي الناس حاقده بالحيل قالت الان مع
مديرتنا الفاضله قالو البنات هلا والله عز الله رحنا فيها يامط مط قلت ماعليكم وش بيصير بتسبنا
خلاص اكلوها وامسحوها بوجهي قالو ليته السب بس اخاف انها تكتبنا تعهد وحنا اخر سنه
عزالله رحنا وطي وضاع مستقبلنا قلت لحوووول خلاص اللي يشوفكم يقول اني قلت كل شي
عندي ماقلت غير الكلام اللي كنا نقوله عنهم يعني ماعلمتهم من احرق البراده ومين حاس
المكتبه ومين كلم من تلفون المديره وهي غايبه ومين حاس برمجة الكمبيوتر ماقلت ذي هي
اللي تودي بداهيه انا قلت الهرج يعني حاجه سهله طلعت المديره بطلتها البهيه امحق بهيه
كانها جورج قرداحي قالت السلام عليكم ورحمة الله وبركاته (( معلومه تراها تهرج من خشمها
فمها ماتستخدمه الا للاكل )) قالت : ايها المعلمات وايها الطالبات اني اليوم هنا لانني رايت
مايحدث بالمدرسه من شغب بين الطالبات وكثر السب وكثر العياره على بعض وقد تاكد لي
ذالك بعد اعتراف اختكم مط مط وانني هنا لكي ارشدكم وادلكم للطريق الصحيح ...... وكلام ماله
لااول ولا تالي وتجي للمهم الطالبه مط مط تفضلي بجانبي لو سمحتي قلت : هلا والله عزالله
رحت طعام جحوش في خيوش وانا اطلع لها وكلي خوف واقف جنبها فيني ثقه وربي موب
طبيعيه واقفه جنبها حاطه راسي براسها لا واناظرها يعني هاه اخلصي وش تبين قالت:امس
يامط مط اعترفتي لنا باللقاب اللي كنتي تلقبيننا بها انتي وشلتك واعتذرتي وهذا شي طيب
منك انك شجاعه وقويه بالمواجهه واكتشفت شجاعتك ايضا عندما انقذتي المدرسه من
الارهابي بدون مايكون هناك اي ضرر للكل وانني اليوم اتقدم لك بالشكر على الشجاعه واقدم
لك هذا الدرع التذكاري وانا اللي افتح خشتي خمسه وعشرين بوصه من زود الوناسه قلت ايه
كذا هذي الناس اللي تقدر نعنبوهم اخيرا عرفو قدري بالمدرسه صدق مصايب قوم عند قوم
فوائدو المهم وانا اشكرها واسلم عليها لاول مره بالتاريخ اسلم على عجوز غير جدتي
واشكرها على تقديرها لمواهبي واوعدها بشجاعه اكثر قالت لا يكفي يامط مط زعلتي ناس
بشجاعتك وانا اجلس اضحك معها وافلها (( بدت تنصب ))
دخلنا فصولنا والبنات بس يهرجون وش صار معي ومن هذا القبيل ونطلع نتفسح ونجلس بمكاننا
المعهود انا وشلتي شلة الانس ونجلس نسولف واحكيهم حكاية الارهابي ويجلسون يضحكون
ويلقبوني بحبيبة الارهابي وانا بس ارومش من الخجل ومادرينا الا البجعه الطالبه الاكثر كرهن
لنا ونحن نبادلها نفس الشعور جايه وقالت لي مط مط ممكن شوي ابيكي بكلمة راس قلت راس
والا رجل واقوم معها وانا ودي اسطرها قالت لي انا ودي اشكرك وبشكرك من كل قلبي
قلت عشان علمت المدرسه ان اسمك البجعه (( الا الان تتمتع بنفس الثقه )) ترى عادي لايق عليك
الاسم لو منك اروح الاحوال واغيراسمي للبجعه ناظرتني وودها تخنقني قالت لا يالغلا ابي
اشكرك على مساعدتك لخطيبي قلت اي خطيب قالت الارهابي اللي امس خطيبي امس بالليل دق
علي وقال انك ساعدتيه قلت يافرحه ماتمت لاشكر على واجب اختي ترى ماسويت لاا الواجب
وانتي تستاهلين كل خير ومبروك مقدما قالت الله يبارك فيكي لازم تحضرين عرسنا قلت
يصير خير باذن الله ورجعت للشله وقلت لهم وش صار معي قالو امحق حظك يكسر الحجر من
شينه ويبدون يضحكون علي قالت مس مس احسن انه مخطوب عشان تفوقين من الاوهام اللي
انتي عايشه فيها وانا دموعي تتحجر بعيوني حتى الارهابي طلع خاطب ومين البنت اللي
اكرها وتكرهني مالت عليهم بس مالت وتمر الايام والشهور وانا بقهري واتمنيت اني سلمته
للشرطه وخليته ياخذ جزاءه (( نذله عشانه طلع خطيب البجعه حاسدتها ))قالت مس مس تصدقين
مط مط احس اننا خرطي ماش ابك البجعه انخطبت وحنا لا قلت حظ يابنت عمي والله الدنيا حظوظ
والا وش زودها عنا والله لاجمال ولا اخلاق ولا حتى خفة دم بس الله مقسم الارزاق وفي يوم من
الايام وحنا جالسات انا ومس مس نتمرجح نسولف بجمعه عايليه باحد الاستراحات الا تجينا
مربوشه قالت ماشفتو اليوم وش صار بالرياض قلنا خير قالت مسكو على ارهابيين وذبحو منهم
اثنين شوفو الجريده وش مكتوب فيها واجلس انا ومس مس نقرا الخبر الا واشوف صورة واحد
واصرخ قالو وش فيك قلت هو والله هو عساني الموت هو قالت مس مس لاتجيبين طاري الموت
الله يخليكي يامط مط يكفي ماجانا من موتك عساك ماتقومين بغينا نروح بخبر كان قلت
وربي هو الارهابي يامس مس اللي جانا بالمدرسه قالت مس مس وشو احلفي قلت والله هو قالت
الله يلعنك هربتي ارهابي صدقي قلت انطمي لايسمعنا احد هم اروح بداهيه ياويلي ويلاه ومس
مس تموووووت ضحك قالت لا وحنا حاسدات البجعه عليه مالت علينا وانا اجلس اضحك حظ
البجعه العن من حظنا يامس مس يلعن ابوه حظ بس قال ايش انا احبه وبجعه تنخطب له وبالاخر
يطلع ارهابي صدقي ومربوشه تتفرج فينا قالت وهم علموني عساكن ماتعرسن يالسلبات
ابتس مغير علومكن بينكن وانا ماكني بنت عمكن يامال العله قولن وراكن ساكتات قلت عيطنا
فرصه يهب عليك مايكفيكي الشات تهذرين فيه ونحكيها الحكايه من اولها لتاليها وتجلس
تضحك معنا وتعطينا محاضره وهذر وانتم بنات قبايل واللي يسمعها اننا مسويات شي وانا
اناظرها وهي تلقي المحاضره قلت مس مس ماودك نطب بالمسبح دام مربوشه لاهيه بالنصائح
ونستلمها تريقه وماخلينا احد بالاستراحه ولا برى الاستراحه انا ومس مس ومربوشه
يعني عادت ريما لعادتها القديما <<<<<<<< موب اسمها ريما هذا مثل ينقال
هههههههههههههههههههه
((اتق الله حيثما كنت واتبع السيئه الحسنه تمحها وخالق الناس بخلق حسن ))
الســـيئات:-
1-عدم حمل السلاح بغير حق (( من حمل علينا السلاح فليس منا ومن غشنا فليس منا ))
2-التنابز بالالقاب
3-((لايدخل الجنه من كان بقلبه مثقال ذرة من كبر )) يعني اللي يشوفون نفسهم علي ومايردون
دايم ردو كلنا عيال ادم وحواء
4-ربط الحلم بالواقع
الحسـنـــــات:-
1-اذا صار لاي انسان موقف مع شخص لايبني على هذا الموقف امال واحلام ورديه يمكن بعدين
يكتشف الحقيقه ويتعب
2-اذا صار لكم اي شي روحو قولو لامهاتكم ترى هم اكثر الناس ادرى بمصلحتكم وماراح
يضرونكم
3-اكبر حسنه بالحياه طاعة الوالدين حتى لو انت مكروه ولو ماتتماشا مع الديمقراطيه بكره
تحصد من وراها خير
4-الله الله بدروسكم وخلو عنكم الخنبقه <<<< علمي نفسك خخخخخخ
هذا اللي عندي باقي اللي عندكم وماقول لكم الا ((ياغلام سم الله وكل بيمينك وكل مما يليك ))
وتشاوووو
وبدون قيود او حدود تمنعهم من القيام بها فمن منا لايطالب بها فمثلا ابوي يطالب بها في عمله
ومجتمعنا لكن لايطبقها في المنزل ويفرض علينا احكام وقوانين صارمه وكاننا نعيش
في معسكر او منطقه تجنيديه فيبدا يومنا من صلاة الفجر وينتهي بالساعه الحاديه عشر وفي
المناسبات الساعه الثانيه عشر ولايستطيع احدمنا المخالفه او البوح بعدم الرضى او السخط من
تلك القوانين فلماذا هو يطالب بالديمقراطيه وهو لايطبقها معنا نحن الذين تحت امرته
وفي المدرسه والجامعه ايضا لايمارسون الديمقراطيه ولكن يطالبون بها فاذا اعترضنا على
نظام معين او طريقة شرح معينه اتهموننا بالمتخاذلات وقالو هذا هو النظام والقوانين اذن لماذا
تطالبون بالديمقراطيه وفي هذا المنتدى ايضا يطالبون بها ولكن لاتطبق بحذافيرها فاذا احد
الاعضاء ابدا رايه في احد الامور او المواضيع نجد الكل يثور ويجول في عقولهم اشياء ليس لها
شي من الصحه اذان فنحن جميعا نطالب بشي لانطبقه في انفسنا فنحن لانستطيع ان نكون
ديمقراطيين اذا لم نغير من انفسنا اولا لنتحرر من الدكتاتوريه وليكن هدفنا ارضا انفسنا ثم
ارضا الغير .
مقدمتي كانت مجرد فلسفه من ماتعلمته من هذه الحياه اتمنى ان تحوز على رضاكم
ابدا قصتي من مدرستنا الثانويه قبل ان التحق بالجامعه وهذه القصه مجرد خيال لم تحدث في
الحقيقه لكن يوجد بها بعض الوقائع الممزوجه بالخيال
ابوي : يلا كل واحد في غرفته ولا اشوف نور مولع بالبيت الساعــــ 11 ــــه مساء تصبحون
على خير وراكم دوامات
مط مط : وانت من اهله ابوي طبعا لايخلو الامر من بوسه لارضا غرور اخو نوره وبوسه لاحلى ام
بالدنيا اخت فتحي
رحت فراشي وجلست افكر وافكر مافيني نوم بس لازم انام امر عسكري وتلقيته واتقلب واتقلب
واتذكر ام كلثوم وهي تقول اتقلب على جمر النار اظن كذا كانت تغني المهم وربي يرحمني
ويغطني النوم وانام نومه حلوه بس قبل الفجر بقليل وعلى غير عاده اصحى قبل الكل على
ذاك الكابوس واحاول ارجع انام بس وين الحين مستحيل لان الكابوس صار قدام عيوني صرت
افكر فيه وماقدرت انام جت امي للغرفه وتصحيني قلت اصلا ماني نايمه ياامي قالت :ليه وش
فيك عسا منتي تعبانه قلت : امي تكفين لاتخليني تكفين ياامي انا احس احساس غريب شكلي
بموت ياامي امي : بسم االله عليك هذي خرابيط ابليس يلعب بعقلك قومي تعوذي منه وصلي
سمعت كلام امي بس الاحساس كل دقيقه ودقيقه يكبر ويكبر لين صرت احس بالجنون منه
انا:امي مابي اروح المدرسه تكفين ابي اجلس معك اخاف اموت وانا بعيده عنك تكفين ياامي
واللي يخلي لك امك وحالتي حاله بس ابكي امي : حركات البنات ماتمر علي بتروحين للمدرسه
يعني تروحين مانيب ناقصه هذر ابوكي وهواشه انتي اللي مخربه البنت وانتي وانتي روحي
الله يهديكي انا: وكلي احساس بقرب المنيه طب بروح بس تكفين امي سامحيني اذا يوم زعلتك
واذا مت استسمحيلي من كل اللي اعرفهم من جماعتنا وخصوصا اللي زعلتهم مني وكنت ا
اسوي فيهم مقالب الله يخليكي امي هذي وصيتي . امي: وهي تضحك ضحكة خوف ايه يصير
خير بس روحي عمك ومس مس ينتظرون قبل ماطلع من البيت مسكت امي يدي وقالت:انتبهي
لنفسك وتعوذي من ابليس حضنت امي بقوه وجلست ابكي سلمي على ابوي امانه وخليه
يسامحني واخواني بعد وودعت امي وانا متاكد اني ماراح اشوفها .
وحنا بالطريق جالسه ابكي بالسياره ومس مس تقول وش فيك قلت بس مزكومه قال
عمي :سلامتك يابنتي قلت: الله يسلمك عمي تكفى سامحني اذا يوم زعلتك قال : وهو يضحك
لا مانيب مسامحك خخخخخخخخ قلت : تكفى عمي سامحني الله يخليك انا حاسه اني بموت
قال عمي :كلنا بنموت وانا عمك اهم شي وش سوينا سوينا خير والا لا هو قال سوينا خير والا
لا بدت تدندن براسي خير وش سويت انا من خير بالدنيا واجلس ابكي وابكي المهم وصلنا
للمدرسه وننزل مس مس :وش ذا يامط مط من جدك تبكين وش صاير احد زعلك احد مضايقك
انا:وانا اشاهق لا ماحد زعلني بس عندي احساس اني بموت مس مس احبك تكفين سامحيني
ترى مالي غيرك مس مس وهات يابكا انا ومس مس والبنات يتجمعون علينا وش فيكم وش صار
عسى ماشر قلت :للشله حقتنا ابد احس اني بموت والبنات منهبلات وش فيها ذي قالت دانه
صديقتي :هبله انتي كلنا بنموت وماحد يدري متى بيموت لو ندري كان علوم قلت :لا انا حاسه
واحساسي مايخيبني حتى اسالو مس مس قالت مس مس:وجع الا بذا لاتقولين كذا احساسك بهذا
الشي خطا صدقيني مط مط لاتقولين كذا ترى بزعل وهي تبكي وميته صياح معي واستسمح
من شلتنا وكل وحده اجلس اتسامح منها بس كيف استسمح من البنات والمديره والمدرسات
ياربيه وش اسوي ابي حل لازم حل لازم اقولهم يسامحوني قبل مااموت واتذكر مس مس واجيها
وهي تستعد للاذاعه مس مس لك والا لذئب قالت :يخسى الذئب وش تبين امري يابعدهم ماقدر ارد
لك طلب كيف عاد وانتي بتموتين قلت :ابي استلف منك دورك بالاذاعه قالت وشو ليه قلت العلم
اللي جاكي قالت ليه واصلا انتي ماتحبين تشتركين بالاذاعه من وحنا صغار وش غير رايك
قلت تكفين مس مس لاتناقشين قالت خلاص لكي اللي تبين كم عندي مط مط كل هذا الكلام
وماغير من شعوري شي ابكي وكل ماشفت وحده استسمحها واناظر يمين وشمال واودع كل
الاماكن المهم واخذ اليوم الاذاعه والكل منذهلين هذي اللي ماتحب الاذاعه وش فيها جايه
وواقفه جنب المايك وانا انسف دموعي وابدا
بديت الاذاعه وقلت لهم اخواتي الطالبات المهويات معلماتي الفاصلات المديره المستديره والكل
يناظرني بحقد وتجي الهبله حقة الاذاعه بتسحب مني المايك قلت اصبري بقول كل اللي
بنفسي قبل ماموت لاني اليوم انا واقفه هنا وابي اقولكم تسامحوني عن كل شي كنت اقوله
بوجهكم وقفاكم عطوني فرصه اهرج وبعدين سووو اللي تبونه قالت ابله عواصف يوووه
قصدي عواطف خلوها تقول اللي تبي المهم قلت المقدمه اللي قلتها تو من مهاويات وفاصلات
ومستديره كنت كل مابديتو اذاعه اقولها قبل ماتقولونه واضحك انا وشلتنا وابله عواطف دايم
تقولنا ليه تضحكون عرفتي السبب ابله عواطف وازيدك من الشعر بيت مسمينك عواصف وهذا
الشي موب مقتصر عليكي الا كل مدرسه لها اسمها ابله منقله اللي هي مدرسة الرياضيات وابله
مخرفين انتي طبعا ابله نرمين وابله مراطيس ابلة الطبخ وابله وهذا موب على المدرسات بس
حتى البنات ومس مس تجيني طايره بس يامط مط وش تسوين دهورتي مستقبلنا قلت انا بموت
خليني اقولهم عشان يسامحون قالت مس مس لو سامحوكي هم انا ماراح اسامحك انا والشله
بكذا راح تدهورين مستقبلنا وانتي تقولين بموت انتي موتي بدون اي ضرر لنا انا لمس مس
خليني مس مس اذا لي معزه المهم واكمل وماخليت وحده الا وقلت لها وش كنا نقول عنها
وتصرخ وحده من الشله تقول بسسسسس كفايه حرام عليك قلت وبعد مابينت لكم وش كنت انا
وشلتي شلة الانس نقول عليكم وش نحش فيكم ابيكم تسامحوني تكفون سامحوني قولولي
انكم سامحتوني الله يخليكم انا بموت تكفون حاسه يومي قريب وانا بهم والعالم بهم كيف
ينتقمون مني انا وشلتي اللي صارت اوراقنا مكشوفه وشلتي تفكر كيف تدافع عن نفسها
بعد ماحطيتهم قدام الامر الواقع وورطتهم وانا ماعندي ماعند جدة ابوي وارجع لمكاني
بالطابور والبنات يقرصون فيني وانا اقول القرص بالميت حرام
دخلنا فصولنا وتدخل علينا مدرسة الدين وبعد ماسلمت قالت مط مط وش سويتي اليوم الله
يهديكي تدرين ان الكلام اللي قليته بيوديكي بداهيه انتي وشلتك قلت انا خلاص ابي اقول
الحقيقه عشان الناس تسامحني اخاف اقابل ربي وانا حاشه بذي وذابه علي ذي ابي كل اللي
يعرفوني يسامحوني قالت:وانتي وش يخليكي تقولين كذا الله يهديكي انا شفت حلم وحسيت
انه بيتحقق لاني اذا شفت حلم يتحقق مدري ليه المهم جلست تنصح وتهرج وتهذر وانا اصلا
خلقه ابكي وزادتني بدون ماتدري وتخلص الحصص الاولى اللي هي ثلاث حصص وانا اصلا
مافهمت شي ومس مس تحاول بس مافيه امل المهم تبدا وقت الفسحه انتم تقولون فسحه والا وش
تقولون لها يعني وقت بلع السندوتشات وجميع ماقدرك الله على تعاطيه في ذاك الوقت حبوب
اي شي حبوب راس يعني اذا مصدع وتفكر بالموت زي حالتي والدنيا برد مره قالت مس
مس:خلنا نطلع بالساحه اللي برى عشان تغييرين مكان موب نفس مكاننا بالساحه الداخليه
قلت:مايفرق معي اصلا خلاص كله زي بعضه اهم شي انتم وش تبون قالو البنات كلهم لابنطلع
برى احسن حتى مافيه بنات كثير لاننا صرنا نحس البنات يناظروننا بحقد موب طبيعي وشكلهم
اخر الفسحه بيصفقوننا قلت انا بتفاهم معهم قالو ليتك تسكتين بس لاتصير اخرتك على
يديننا قلت لاتستعجلون هي جايه جايه مير منكم يمكن تهون وجلسو يسولفون وينكتون يبون
انسى قالو شوفي البجعه جايه هنا وش تبي ذي ووحده من الشله تقول تقهر ذا البجعه شايفه
نفسها وانا اقول استغفرو ربكم حرام البنت ماسوت لنا شي المهم كان هواء قوي مره اعظم
البنات اللي كانو برى دخلو بقت شلتنا وشلة كم بنت المهم الا البواب داخل علينا ونصرخ
ونصيح انا ومس مس ووحده من شلة البنات الثانيات وكم بنت بعيدين تجمدنا من الخوف الا ذاك
الرجال لابس ثوب رمادي ويجري جهتنا ومتلطم وجاي يجري علي ومعه بندقيه طويله انا احس
الدنيا تدور فيني ومتجه لمى قلت ياويلي عزالله رحتي طعام جحوش واستسلم لامري الواقع
واقف واستشهد قال :من وين اروح واشر له على الدوران الخلفي للمدرسه ويتعداني ويروح
لمه وانا استانس قلت : الحمد لله وتجي الشرطه وتصير المدرسه حوسه قالو هذا ارهابي وحنا
نلاحقه وربكم حميد كنت انا وشلتي ذاك اليوم متفقين نلبس شالات طويله وانا كنت لابسه واحد
ازرق احب اللون الازرق ومن ذاك اليوم حبيته اكثر واكثر والفه على راسي ويجي الضابط لمي
قال وين راح قولي لاتخافين ياختي قلت لدوران الخلفي للمدرسه ومادرينا الا يطل علينا من
سطوح المدرسه قاله الضابط انزل والا ترى بنطلق عليك النار قال :ماني نازل الا معي رهينه
وانا متنحه فيهم اتفرج احب اشوف الحدث اول باول ومس مس طبعا والشله متنحين معي نحب
العلوم نبي بعدين ننشرها بكل مصداقيه قال :الضابط بعد ارهابي ويتشرط قال :لو ماترسلون
رهينه افجر المدرسه وهو قالها والضابط تغير علومه
قال:الضابط برسل لك واحد من العسكر قال الارهابي :لا ماتمشي علي هذي الحركات ابي
وحده من البنات وحنا سمعنا ذا الكلام وكل وحده تبي تحط رجلها ونسينا جمع العلوم والوقايع
والمصداقيه قال الضابط :خلاص ويلتفت لينه يشوف بنت انا مسميتها دايره شنو قال :اطلعي
ياختي ترى شوي وترجعين قالت له :لو تقطع راسي ماطلعت له قال الارهابي :لامابي ذي ابي
غيرها قلت انا بخاطري :وجع بعد تتشرط انت ووجهك قال:ابي ام ايشارب ازرق قلت:هلا والله
بعد تحدد الوان نسيت ان ايشاربي ازرق من الخوف قال الضابط:لي روحي ياختي اطلعي لم
الارهابي واقنعيه ينزل معك قلت :لا تكفى عمي الضابط لاتخليني اطلع قال :هذا واجب وطني
وانا عمك روحي قلت لاتكفى الله يخليك الله يخلي عيالك الله يخلي لك حرمتك الله يرحم امك
الله وماخليت دعوه الا دعيتها له وهو مصر واجلس اصيح وافكر بطريقه تخلصني من الورطه
وتطري علي فكره قلت شوف موب التجنيد الاجباري ماياخذون اللي وحيد عند اهله قال
الضابط :ايه قلت خلاص انا وحيدة امي ماعندها بنت غيري حتى اسال بنت عمي مس مس صح
مس مس قالت مس مس :صح بس امك منغثه منك يمكن يصير شي عادي عندها انك تصيرين فدا
للوطن قلت امحق بنت عم والله امي تبيني تكفى عمي الضابط الله يخليك الله ينجحك
قال اقول اطلعي لافرغ المسدس براسك الملعون ابو كرش كبيره كانها كرش جورج الغامدي
غصبني يعني تنفيذ اجباري امر عسكري وينفذ بكل حذافيره قلت وينكم ووين الديمقراطيه
يامال العله سعوديين وعرب الله لايهنيكم بالدنيا بعدي وطلعت مع سلم النجاه اللي طلع معه
الارهابي وانا اوصي مس مس انها تسلم على امي وتسلم على اهلي كلهم وتقولهم اني مت فدا
للوطن ويكتبونها بالتاريخ حق سادس عشان كل البزران يعرفون اني بطله واطلع وقبل ماوصل
بشوي قلت مس مس امانه معك روحي لغرفتي وافتحي جهازي وامسحي كل الصور وامسحي
الكوكيز تكفين بنت عمي قالت الصور اعرف احذفها بس الكوكيز وشلون قلت بعدين اعلمك
عساكي العله لازم كل شي اعلكم عليه والا تدرين خلي المربوشه تسوي لجهازي فورمات
احسن عشان السريه بس والله جهازي مافيه شي بس الاحتياط واجب يمكن احد داز لي فيروس
شي والا مرسلين لي صور بدون مدري (( نصب ))
ووصلت للارهابي وانا استشهد واقرا كل صور القران اللي اعرفها مع اني حست بعضها على
بعض اجيب ايه من هنا وايه من هناك والله من الخوف اللي صايبني ومادريت الا الارهابي يمد
يده يقول هاتي اساعدك قلت تبي تساعدني خلني انزل الله يخليك انا مسكينه وامي ماعندها
غيري تكفى الله يخليك لاتموتني الله يدخلك الجنه الله ينجحك الله يوفقك في كل شي تربو
نفسك له ويجلس يناظرني ويضحك ويقول:تصدقين تنفعين شحاده عند باب الحرم كل ذي
دعوات ماخلصت دعواتك تحت جيتي تدعين عندي بعد ناظرته وعيوني مليانه دموع وقلت :طب
لاتذبحني قال :يابنت الحلال انا ماني ارهابي ويفك اللطمه وياويلي يوم فكها كانه فاتح لي
باب من ابواب الجنه قلت:وش انت اجل قال:يابنت الحلال ابو كرش ذا اللي تقول انها كرش جورج
الغامدي شافني وانا ببلكونت بيتنا ومعي الساكتون ذا واصوب على علبة بيبسي حاطها
بالشارع قال بس ارهابي وهو طردي ورايه من شارع لشارع ومن حاره لحاره قاطعته
وقلت :وانت ليه تسوي كذا وتجيب لك الشبهات ماتدري ان الشرطه عندنا مع الخيل ياشقرا لو
يشوفون معك نبيطه قالو بس ارهابي هذا كله وانا اتامل وسامته عسا المنتدى يفداه والدنيا
كلها تفدا جماله وجمال سكسوكته ورموشي تبدا تخبط فوق تحت قال :يابنت الحلال هذا الطفش
تخيلي انا متخرج من الجامعه وبتقدير امتياز ومالقيت لي وظيفه ومن الطفش قلت اتعلم الرمايه
تدرين ماعندنا معاهد متخصصه بهذا المجال وكل شي حرام على العزوبي يدخله ملاهي منتزه
سوق اي شي محرم علينا الا برفقت وحده معنا وانا من وين اجيب وحده ترافقني كل مكان
اروح له قلت :وانا رحت وين هذا بخاطري طبعا الله ياخذ اللي ماترافقك والله ارافقك لو لابو
زعبل اهم شي معك ووين مايروح الاخضر انا وياه وهو يكمل كلامه عن العزوبيه والعالم اللي
تحت تنتظر اخر المحاوره اللي بيني وبينه وعلى بالهم انه الحين بيذبحني مادرو اني انذبحت
من جماله وينادينا الضابط ويقاطعنا الله يقطع عمره ويعجل اجله ويقص روحه قال:هيه
يارهابي وين رحت وش سويت بالبنت قال الولد :تكفين يابنت الاجواد ابيكي تهربيني انتي
اول مره انقذتي حياتي يوم دليتيني على الدرج الخلفي قلت :انا متى قال اول مادخلت
اشرتيلي بيدك وانا رحت ولقيت الدرج وطلعت منه للسطوح قلت ايه انا اشرت بس والله من
الخوف قال :طب تقدرين تدليني على مخرج انحاش منه لايمسكوني قلت:بس تبي ادلك
مكان تتخبى به ماتبي ادلك بيت اهلي بعد قال:تتريقين قلت لاوربي بس استهبل قلت عندي
والله مكان بس اخاف مايعجبك قال:اي مكان بيعجبني ولا كرش ذا الملعون اللي تحت نشف
ريقي الله ينشف دمه بعروقه عساه الساحق الماحق قلت امين يارب المهم دليته من وين ينزل من
الدرج الرئيسي ويتجه الى الحمام المهجور الله يعزكم ويجلس فيه لين اشوف له صرفه قالي
انتي متاكده ان ماحد يجيه قلت اصلا ماحد ينتبه ان فيه حمام من كثر موب مهجور راح يتخبى
وانا نزلت من الدرج حق الطواري
نزلت وانا اغني ياي سحر عيونو نظارتو اول ماتلائينا عين بعين ياي شو مهضومه كلماتو ذبت
بكلمه كيف لو كانو تنين كلمه وصار البي بكلمه نار على نار بسمه على بسمه البي احتار
نساني اسمي مدري كيف هواي مدري كيف هواي وعيوني تروح يمين ويسار وانفش بشعري
عبالي اني حلوووه والا يقاطعني ابو كرش كانها كرش جورج الغامدي قال اين الرجال <<<<
جنوبي ترى قلت له مدري طلعت وجلس يهرج ويهدد واختفى تقول انه بسم الله الرحمن
الرحيم قال :انتي صاحيه قلت له وش تشوف ياعسكري خربت اخلاقي معه طلع عسكري وانا
احسبه ضابط قلت الرجال اختفى وانا رجعت بالسلامه قال :ايش نبغى فيش قلت فيش والا محول
اهم شي رجعت وانطم رح دوره يالخواف اجل مرسلني للارهابي وانت جالس تناظرني انت
ووجهك والله لارفع عليك دعوى واقول انك ضحيت بوحده من الطالبات واي طالبه مط مط بنت
اخو نوره مرسلني لواحد عشان يذبحني وانت مندس هنا بين المدرسات يالخبل واستلمه هواش
المهم اني خليته ينسى اسمه من كثر هواشي له ورجعت للبنات وهم فرحانين ويهنوني
بسلامتي قالو لي :وش صار لك فوق انتي متغيره 180 درجه قلت لو شوفتو اللي شفته
يااااااااااااااااااااي سحر عيونو نظراتو يااااااااااااي شووووو مهضومه كلماتووو ويقاطعني الله
يقطعه ذا الغبي العسكري قال :انتي ماشفتي من اين راح الرجال قلت:قول امين الله يعطيك
مايذيك انت وراك علي خلني بحالي خلاص انقلع ياعسكر تبون الحقيقه هو وده يدوره بس
خايف الجبان ويبيني ادوره له معصي افتن على صديقي ايه ليه مستغربين صار صديقي موب
انا انقذته المهم وارجع لصديقاتي واسولف معهم واعلمهم عنه وكلهم منبهرات باللي اقوله
وطاح من نظرهم الخبل العسكري قالو طب هو وين الحين ذا الارهابي قلت مدري ماعرف عنه
شي قالي انه موب ارهابي واختفى مدري وين راح ايه تدرون انا مابي افتن عليه لاني ناويه
اساعده للنهايه وخفت تكون فيه وحده جاسوسه وتعلم عليه حرام
بعد ساعه امر الضابط باخلا المدرسه وتوجهنا يالطالبات ناخذ اغراضنا والمدرسات طبعا وانا
سويت ان عبايتي ضايعه ورحت لام حسن الخاله اللي بالمدرسه قلت لها عندك عبايه انا عبايتي
ضاعت مع ذا الزحمه قالت ماعندي الا عبايه بس ماتنفع لك كبيره وبعدين ترى وسخه قلت اي
شي بس اهم شي يستر قالت خلاص خذي الا معطتي خيمه موب عبايه وفوق كذا مغبره بشكل
فضيع تحسون انها جايبتها من البر موب من دولاب المفقودات اخذتها وتوجهت للحمام
المهجور الله يعزكم ومس مس تدور علي عشان نطلع مع بعض قلت لها بعدين اجيك عند الباب
راحت بنت عمي وكلها استغراب من تصرفاتي ورحت ولقيت الارهابي ترى موب ارهابي
وعطيته العبايه وطلعته من وسط الزحمه برى المدرسه ولو تشوفون شكله بالعبايه تضحكون
ماقول الا ياشين الرجال بالعباة شكله تحفه يموووووت ضحك صاير كانه حرمه عفشه ودفشه
وهبله ومشيه يضحك لا والرجول اللي باينه كوم بس زين ماحد انتبه له من الخوف والزحمه وهو
راح بحال سبيله وانا اكلتها بس افكر فيه وفي نظراته وكلامه المرتب وصرت افكر وافكر المهم
واحنا ننتظر السياره صارحت مس مس ماقدر اخبي عنها شي قالت يامجنونه افرضي انه
ارهابي صدق وضحك عليكي بالكلام ذا وش يكون موقفك من وطنك ودينك وعروبتك
وتستلمني كانها فيصل حق الجزيره حق برنامج فيس تو فيس قلت لها ليتك تسكتين وربي لو
تشوفينه موب تهربينه الا تروحين تفجرين الفيصليه عشانه سبحان من صوره مس مس بقولك
شي بس ابيكي تسمعيني للنهايه قالت يلا انا كلي اذان صاغيه قلت لها : عايزه احس احساس
جديد انسى الدنيا واعيش بعيد واغير حياتي مادريت الا بالشنطه على راسي قالت خير وش
تبين ياهيفاء وهبي بنت عمي اسكتي وضبطي حالك لاضبطك وانا اسكت واجلس ادندن بيني
وبين نفسي ياااااي سحر عيونو كلماتووو وهي تناظرني بنظرات كلها ازدرا وتقول الحمد لله
والشكر هذي اللي الصبح بتموت وصاجتنا بموت وسامحوني الحين مسويه رومنصيه الله يخلف
على عمي وزوجته ابك هذي بنت والا مخفه انضحك عليها ومصدقه نفسها انها تحب وليته واحد
زي الاوادم ارهابي ياشماتت ابلا تازه فينا وفي جماعتنا وجت السياره ورحنا لبيوتنا
وادخل البيت واسلم عليهم واحضن امي بقوه واقولها احببببببببببببك ياحلى ام قالت :وشلونك
وش سويتي بالمدرسه قلت بقولك كل شي يامي ياحلا ام بس ابدل ملابسي واجي ونزلت لامي
اسرع من البرق واجلس اقولها كل شي سويته من اول ماجيت لين طلعت من المدرسه وامي
ساكته تسمع هذا احلى شي بامي تسمع لك لين تخلص وبعدين تسالك وتتحاور معك بكل
هدوء حتى لو الشي موب عاجبها ويومني خلصت قالت زين ممكن اسالك قلت طبعا قالت اول
شي وش جاب طاري الموت عليكي قلت لها ياامي انا حلمت حلم ان فيه ملاك اخذني من بين
صديقات ومدرساتي وطار فيني للسماء يووووووووووووووه تصدقين ياامي انه هو الارهابي
والله هو تفسير الحلم قالت لي وهي ميته ضحك طيب هذا حلمك فسرتيه طيب سؤال ثاني
قلت اسال ياقميل قالت انتي ليه ساعدتي الارهابي قلت عجبني واقنعني انه موب ارهابي
اصلا ياامي لو تشوفينه موب ارهابي والله ياامي رقيق وحبوب والبراءه تشع من عيونه شع
شع قالت طيب انتي الحين تفكرين فيه صح وتحسين انه فارس احلامك صح قلت لامي وليه
الاحراج مامي قالت بس يابنتي ترى بعض الاحيان الانسان يحس باشياء ميب واقعيه ويمكن
يخونه احساسه تذكرين يوم كنتي معجبه بذاك المذيع الاجنبي لحد انك كنت تتابعين
برنامجه وانتي موب فاهمه شي قلت امي ووع هذاك غير كان فترة هبال مني اجل اعجب
بمسيحي قالت طب لاتفكرين بذا كثير خلي الامر يمشي عادي انا عارفه وانا امك انك راح
تفكرين بس اتمنى تفكيرك مايتعدا الموقف اللي مريتي فيه ولا تبنين عليه احلام وامال ماراح
تتحقق وفكري انك عشتي تجربه غريبه كانك بملاهي بس لاتطورين الفكره براسك وانا امك
بعدين تتعبين وانا مايهمني بالدنيا غير مصلحتك لانك بنتي الوحيده واي شي يصير اعرف انك
بتقولينه لي قلت لها اكيد امي اصلا من وانا صغيره اي شي يصير اقوله بكل صراحه لاني احس
انك معي بكل وقت وقمت من عند امي ورحت ارتاح شوي وافكر بكلامها اللي كله صح بصح
يابعدهم يامي مدري وش حياتي بتكون بدونك الله لايحرمني منك
بكذب عليكم لو قلت لكم اني ماكنت افكر في الارهابي اللي موب ارهابي افكر في كلامه
وفي شكله في كل شي صار المهم تعبت من التفكير ونمت واصحى على صوت اخوي يقول
قومي امي تقولك انزلي لها بيجيها حريم قلت طيب بعد ماصحيت وكشخت وكل شي طلعت من
غرفتي الا اخوي بالصاله قال هلا بالفدائيه قلت وش تبي انت قال احلا شفتي نفسك علينا يوم
صرتي فدائيه قلت لافدائيه ولا ارهابيه قال انا الحين مفتخر فيكي يااختي قلت طيب وش تبي
<<<< اخلاق مع اخوانها قال يامال المرض تعالي حكيني مافيه زيك بسرد العلوم قلت موب
الحين بشوف امي وانزل وينزل معي قالت امي مابعد جو الحريم قال زين يلا عشان تحكيني
قلت طب انت وش عرفك قال اخو مس مس قالي وبعدين سالت امي قالت ايه اذا قامت هي
تقولك اللي تبي تعرفه والحين ممكن تتلطفي وتتفضلي وتهزي طولك وتقولين لي وش السالفه
ناظرته بنص عين قلت له الحكايه من الاول الا الاخير قال هربتيه قلت ايه مسكين موب ارهابي
قال ياخوفي منك تقدرين تسوين كل شي قالت اسكت بس شوي الا الاخ الاكبر يدخل علينا
ونستمله انا واخوي الصغير قلنا هلا بصاحب الشركات هلا بالاموال المتحركه هلا بالاداره هلا
باللي يبي يصير وليد المستقبل تراه يدرس ادارة اعمال وحنا بس تريقه عليه وعلى قسمه
مسوي تاجر الخبل وعلى مين علينا ويتكلم بالاقتصاد وكيف تديرون اعمالكم ومن هالخرابيط
يعني بالعربي غاثنا قال انطموو الا تعالو مادريتو فيه مدرسه بالرياض للبنات دخلها ارهابي
كل الناس تهرج بالجامعه قلت قديمه ناظرني الصغير عساه مايكبر قولي له ياليمه <<< ولعت
طب يابهيمه وحكيناه السالفه ويستلموني تريقه وخرابيط يام الارهابي ياللي تهرب ارهابي
بكره بنشوف الاستخبارات عند بيتنا تدورك ياويلك وانا ساكته اتبع المثل اللي يقول الحقران
يقطع المصران واساعد امي وماتكلم معهم ويخلص اليوم باليوميات المعهوده بكل بيت بتسالون
عن ابوي ابوي ترى بس يلقي اوامر وحنا ننفذ وغالبا بشغله وبعدين بديوانيتة يعني مانشوف
الا اذا يبي يهاوش او يعطي اوامر جديده او باللفه الاخيره قبل النوم بس
صحيت الصباح ورحت للمدرسه ويوم دخلت انا ومس مس الا الشله جايه قالت مادريتو مافيه اذاعه
اليوم قلنا ليه خير انشاء الله قالو المديره بتلقي كلمه قالت مس مس اللي خفت منه صار كله منك
ياللي بتموتين ضيعتي مستقبلنا قالو كل البنات ايوا الله يامط مط مستقبلنا ضاع والسبه انتي
الله ياخذك قلت انا بتصرف ماعليكم قالو ماودانا بداهيه الا تصرفاتك حسبي الله عليك وانا
ساكته حاسه بالذنب يعني لو مصبره شوي كان عرفت تفسير حلمي بدل ماحوس الدنيا صدق
اني مطيوره اسم على مسمى مادريت الا مس مس تشد يدي وتاخذني على طرف قالت وش
سويتي قلت في ايش في الارهابي قلت طبخته واكلته انتي تدرين وش سويت بلا بلاهه بس
قالت الله يستر بس لايصير لنا شي والسبه انتي قالت انا بروح اشوف مدرسة الاذاعه وش عند
المديره واجيبكم وننتظر مس مس وماجت المهم صفينا بالطابور الا مس مس تطلع قالت جملتها
المعهوده وانا ودي اضحك بس امس معترفه بكل شي يكفي الناس حاقده بالحيل قالت الان مع
مديرتنا الفاضله قالو البنات هلا والله عز الله رحنا فيها يامط مط قلت ماعليكم وش بيصير بتسبنا
خلاص اكلوها وامسحوها بوجهي قالو ليته السب بس اخاف انها تكتبنا تعهد وحنا اخر سنه
عزالله رحنا وطي وضاع مستقبلنا قلت لحوووول خلاص اللي يشوفكم يقول اني قلت كل شي
عندي ماقلت غير الكلام اللي كنا نقوله عنهم يعني ماعلمتهم من احرق البراده ومين حاس
المكتبه ومين كلم من تلفون المديره وهي غايبه ومين حاس برمجة الكمبيوتر ماقلت ذي هي
اللي تودي بداهيه انا قلت الهرج يعني حاجه سهله طلعت المديره بطلتها البهيه امحق بهيه
كانها جورج قرداحي قالت السلام عليكم ورحمة الله وبركاته (( معلومه تراها تهرج من خشمها
فمها ماتستخدمه الا للاكل )) قالت : ايها المعلمات وايها الطالبات اني اليوم هنا لانني رايت
مايحدث بالمدرسه من شغب بين الطالبات وكثر السب وكثر العياره على بعض وقد تاكد لي
ذالك بعد اعتراف اختكم مط مط وانني هنا لكي ارشدكم وادلكم للطريق الصحيح ...... وكلام ماله
لااول ولا تالي وتجي للمهم الطالبه مط مط تفضلي بجانبي لو سمحتي قلت : هلا والله عزالله
رحت طعام جحوش في خيوش وانا اطلع لها وكلي خوف واقف جنبها فيني ثقه وربي موب
طبيعيه واقفه جنبها حاطه راسي براسها لا واناظرها يعني هاه اخلصي وش تبين قالت:امس
يامط مط اعترفتي لنا باللقاب اللي كنتي تلقبيننا بها انتي وشلتك واعتذرتي وهذا شي طيب
منك انك شجاعه وقويه بالمواجهه واكتشفت شجاعتك ايضا عندما انقذتي المدرسه من
الارهابي بدون مايكون هناك اي ضرر للكل وانني اليوم اتقدم لك بالشكر على الشجاعه واقدم
لك هذا الدرع التذكاري وانا اللي افتح خشتي خمسه وعشرين بوصه من زود الوناسه قلت ايه
كذا هذي الناس اللي تقدر نعنبوهم اخيرا عرفو قدري بالمدرسه صدق مصايب قوم عند قوم
فوائدو المهم وانا اشكرها واسلم عليها لاول مره بالتاريخ اسلم على عجوز غير جدتي
واشكرها على تقديرها لمواهبي واوعدها بشجاعه اكثر قالت لا يكفي يامط مط زعلتي ناس
بشجاعتك وانا اجلس اضحك معها وافلها (( بدت تنصب ))
دخلنا فصولنا والبنات بس يهرجون وش صار معي ومن هذا القبيل ونطلع نتفسح ونجلس بمكاننا
المعهود انا وشلتي شلة الانس ونجلس نسولف واحكيهم حكاية الارهابي ويجلسون يضحكون
ويلقبوني بحبيبة الارهابي وانا بس ارومش من الخجل ومادرينا الا البجعه الطالبه الاكثر كرهن
لنا ونحن نبادلها نفس الشعور جايه وقالت لي مط مط ممكن شوي ابيكي بكلمة راس قلت راس
والا رجل واقوم معها وانا ودي اسطرها قالت لي انا ودي اشكرك وبشكرك من كل قلبي
قلت عشان علمت المدرسه ان اسمك البجعه (( الا الان تتمتع بنفس الثقه )) ترى عادي لايق عليك
الاسم لو منك اروح الاحوال واغيراسمي للبجعه ناظرتني وودها تخنقني قالت لا يالغلا ابي
اشكرك على مساعدتك لخطيبي قلت اي خطيب قالت الارهابي اللي امس خطيبي امس بالليل دق
علي وقال انك ساعدتيه قلت يافرحه ماتمت لاشكر على واجب اختي ترى ماسويت لاا الواجب
وانتي تستاهلين كل خير ومبروك مقدما قالت الله يبارك فيكي لازم تحضرين عرسنا قلت
يصير خير باذن الله ورجعت للشله وقلت لهم وش صار معي قالو امحق حظك يكسر الحجر من
شينه ويبدون يضحكون علي قالت مس مس احسن انه مخطوب عشان تفوقين من الاوهام اللي
انتي عايشه فيها وانا دموعي تتحجر بعيوني حتى الارهابي طلع خاطب ومين البنت اللي
اكرها وتكرهني مالت عليهم بس مالت وتمر الايام والشهور وانا بقهري واتمنيت اني سلمته
للشرطه وخليته ياخذ جزاءه (( نذله عشانه طلع خطيب البجعه حاسدتها ))قالت مس مس تصدقين
مط مط احس اننا خرطي ماش ابك البجعه انخطبت وحنا لا قلت حظ يابنت عمي والله الدنيا حظوظ
والا وش زودها عنا والله لاجمال ولا اخلاق ولا حتى خفة دم بس الله مقسم الارزاق وفي يوم من
الايام وحنا جالسات انا ومس مس نتمرجح نسولف بجمعه عايليه باحد الاستراحات الا تجينا
مربوشه قالت ماشفتو اليوم وش صار بالرياض قلنا خير قالت مسكو على ارهابيين وذبحو منهم
اثنين شوفو الجريده وش مكتوب فيها واجلس انا ومس مس نقرا الخبر الا واشوف صورة واحد
واصرخ قالو وش فيك قلت هو والله هو عساني الموت هو قالت مس مس لاتجيبين طاري الموت
الله يخليكي يامط مط يكفي ماجانا من موتك عساك ماتقومين بغينا نروح بخبر كان قلت
وربي هو الارهابي يامس مس اللي جانا بالمدرسه قالت مس مس وشو احلفي قلت والله هو قالت
الله يلعنك هربتي ارهابي صدقي قلت انطمي لايسمعنا احد هم اروح بداهيه ياويلي ويلاه ومس
مس تموووووت ضحك قالت لا وحنا حاسدات البجعه عليه مالت علينا وانا اجلس اضحك حظ
البجعه العن من حظنا يامس مس يلعن ابوه حظ بس قال ايش انا احبه وبجعه تنخطب له وبالاخر
يطلع ارهابي صدقي ومربوشه تتفرج فينا قالت وهم علموني عساكن ماتعرسن يالسلبات
ابتس مغير علومكن بينكن وانا ماكني بنت عمكن يامال العله قولن وراكن ساكتات قلت عيطنا
فرصه يهب عليك مايكفيكي الشات تهذرين فيه ونحكيها الحكايه من اولها لتاليها وتجلس
تضحك معنا وتعطينا محاضره وهذر وانتم بنات قبايل واللي يسمعها اننا مسويات شي وانا
اناظرها وهي تلقي المحاضره قلت مس مس ماودك نطب بالمسبح دام مربوشه لاهيه بالنصائح
ونستلمها تريقه وماخلينا احد بالاستراحه ولا برى الاستراحه انا ومس مس ومربوشه
يعني عادت ريما لعادتها القديما <<<<<<<< موب اسمها ريما هذا مثل ينقال
هههههههههههههههههههه
((اتق الله حيثما كنت واتبع السيئه الحسنه تمحها وخالق الناس بخلق حسن ))
الســـيئات:-
1-عدم حمل السلاح بغير حق (( من حمل علينا السلاح فليس منا ومن غشنا فليس منا ))
2-التنابز بالالقاب
3-((لايدخل الجنه من كان بقلبه مثقال ذرة من كبر )) يعني اللي يشوفون نفسهم علي ومايردون
دايم ردو كلنا عيال ادم وحواء
4-ربط الحلم بالواقع
الحسـنـــــات:-
1-اذا صار لاي انسان موقف مع شخص لايبني على هذا الموقف امال واحلام ورديه يمكن بعدين
يكتشف الحقيقه ويتعب
2-اذا صار لكم اي شي روحو قولو لامهاتكم ترى هم اكثر الناس ادرى بمصلحتكم وماراح
يضرونكم
3-اكبر حسنه بالحياه طاعة الوالدين حتى لو انت مكروه ولو ماتتماشا مع الديمقراطيه بكره
تحصد من وراها خير
4-الله الله بدروسكم وخلو عنكم الخنبقه <<<< علمي نفسك خخخخخخ
هذا اللي عندي باقي اللي عندكم وماقول لكم الا ((ياغلام سم الله وكل بيمينك وكل مما يليك ))
وتشاوووو