المســـيار

[شوكولاين]

انتشرت في مجتمعنا ظاهرة زواج المسيار يعني باختصار صارت مثل الموضه عند الرجال كل واحد يضيق صدره من حرمته يصك له حرمه مسيار يونس عمره يحسبونها فله ما دروا ان اضراره اكثر حسناته

تعريف زواج المسيار : زواج شرعي تتنازل فيه المراه عن كامل حقوقها لا سكن ولا نفقه واحيانا حتى الاطفال ممنوع واللي تتلقف وتحمل ممكن يوصل في الرجل الامر انه ينكر زواجه بكل بساطه منها .


وقد حصلت في الرياض


وطبعا المراه الي تتزوج مسيار رخيصه أي نعم رخيصه مالها بيت ولا كرامه ولا حتى تقدر تقول وين رحت ووين جيت

يا ترى مين السبب في رخص المراه معقوله المشايخ ارخصونا لها الدرجه

مقوله قالتها لي صديقتي انا اشهد انها صدقت تقول لاعاد تستشير شيخ مصري في مسالة فلوس ولا تستشير شيخ سعودي في مسالة زواج

يعني المشايخ أي شي فيه متعه لهم وتغيير في الحريم يحللونه على طووول

الشيخ بن باز الله يرحمه ويغفر له ما انكر انه حلل هذا الزواج بس لفئه معينه وتحت شروط معينه لكن اللي قاعد يصير اللحين ينافي كل كلام الشيخ

اليوم خبر في الجريده انه الزواج المسيار ب 1000 ريال والنظره الشرعيه ب 500 ريال خير ان شاء الله سلعه هي

يعني اللي يفكرون في هالزواج يفكرون في بنا أسره متماسكة ويربون أطفالهم على طاعة الله سبحانه وتحقيق واجبات كل واحد فيهم والا يفكرون في نزوه كم شهر وكم سنه وتنتهي

اعرف لكم شاب في الجامعه بكل وقاحه وقوة عين جاي عند أمه يقول يمه دوري لي وحده مسيار لين أتخرج من الجامعة وأتزوج زي كل خوياي يعني حتى الشباب طاحوا فيه

طيب ما اختلفنا الرجال ما ينلامون

لكن الحرمة مين اللي تقبل تتزوج بهالطريقه يا ترى اللي فيها عاهة لا سمح الله او اللي فيها عيب او اللي عنست وفاتها قطار الزواج او المطلقة او او او مين يعني أنا أبي افهم

أنا طرحت الفكرة عليكم و أتمنى تبينون لي افكاراكم ووجهات نظركم في الردود


تقبلوا تحياتي


أختكم : شـوكـولاين

[المطيوره]

مقوله قالتها لي صديقتي انا اشهد انها صدقت تقول لاعاد تستشير شيخ مصري في مسالة فلوس ولا تستشير شيخ سعودي في مسالة زواج

ههههههههههههههههههههههههه حليل صديقتس ذي اعجبتني عليها تفسيرات بس موب ازين خويتي

اللي تقول كل ماشفت مطوع قلبي تلوع موب من زينه لها مآرب اخرى لم اعلم بها حق علمه << مقصره الفستان

المهم موضوع في غاية الروعه وراح عليتس يامس مس كخخخخخخخخخ

شوكولاين لي رجعه اكيد ياختس الحين بروح اصلي واسير <<<<< ودها تسير

لي باتس كبر خشمتس يالشينه شوكولاين
تشاوو

[ناعسة الطرف]

غررريبه من البنت اللي بترررضى بهذا الزوووواج <<<< رخيييصه زي ما قلتي اختي شووكو
شوكو يعطييك الف الف عاافيه على المووضوع

[الملسووونه]

شوكو يابعدهم انتي :158:

اول شي لتس وحشه وادري ادري اني مقصره وقاطعه :158:

ثاني شي كنتس تقرين افكاري يابنت كان هذا الموضوع في بالي خخخ

ولانه اصبح حديث الناس هالفتره خصوصا بعد صدور فتوه بإجازته فكرت بطرحه ولكن في فعالية القسم العام :158:


اختيار موفق منك ياعبقرينوووو :286:

ولي باتس على الموضوع برد يعجبتس يالغاليه :286:


يسمنوووووووووووووو ياقلبي

وهذا تثبيت لعنونتس ياحبي

وهذا كف حلاقة يعجبتس <<<<< احب احوسها فـ الاخير خخخخخخ



المهم لي باك برد مش أي أي ولا زي زي ولا كل ..... تعرفين الباقي كمليه ياحلوه :301:

[شليــويح كفــوري]

سلآم يآ إبـن بآز ويآإبـن عثيميـن .. مآخلـّـو العميآن الأريآ طريقـة (( صـحّ لسآنكـ يآ إبن علـّـوش )) :)




شوكو يآبعدي دمجتي والله .. مدري وش أقـول عن زوآج الكفـآر هـذآ مدري زوآج المسيآر مدري وش إسم هل إمّ جدّهـ .. لكن إللي أعرفـة وفآهمـة إنـّـة كلمـة الزوآج حرآم يطلقونهـآ عليـة .. لإنـّـة وبمعنـى أصـحّ خليط من الوقآحـة والدنآءهـ والإنحدآر الفكري والذلّ .. أجل وحدهـ مآ أعرفهـآ ولآتعرفني إلآ في الفرآش والسآمعيـن بكرآمـة !! .. لآ أدري عن عيشتهـآ وعن روحتهـآ وجيـّـتهـآ ولآ أدري عن هوآ دآرهـآ وتسمـّـى مرتـي .. تخسى إلآ إهـي !! .. لآ والمشكلـة إنّ هآلمرهـ إللي يقولون إنـّـهـآ مرتي .. رآضيـة بهآلمصخرهـ والمذلـّـة والإهآنـة والإستحقآر إللي إهـي فيـة !! .. أعوذ بآلله .. الدنيآ ورآهـآ غدت تسـذآ يآلربـع ؟! :166: .. لآ وإللي يغبـن ويرفع الظغط .. إن إللي نسمـّـيهم مفتونـآ وقدوتنـآ مآقآلو فيـة شيّ .. ولآبيـّـنو أظرآرهـ والمحرمآت فيـة من إهآنـة وإخلآل وتمهزل وخدش لحقّوق من أحقيـآت المرأهـ .. ألآ وهـي المرآعـآهـ والحفـظ والستـرٍ .. " ولآشآطريـن بـسّ يبيـّـنون الأسهـم النقيـّـة من الأسهـم الغيـر نقيـّـة ويقطعون أرزآق العآلم " !!



من كلّ وآدٍ قطرهــــ /

يا ترى مين السبب في رخص المراه معقوله المشايخ ارخصونا لها الدرجه
المشآيخـة مآلهـم دخل .. حنـّـآ نعتب على المشآيخة في عدم التبيين والإيضآح علشآن مآيصير لأي وآحد ووحدهـ عذرٍ .. السبب في رخص المرأهـ .. المرأهـ نفسهـآ .. يومهـآ ترضى لنفسهـآ بآلمهآنـة والذل وإعتبآرهـآ كسلعـة .. " حآلهـآ حآل الحذو متى مآحسيت إنـّـة عتـّـق نطلتـة ".. الزبدهـ إنّ المرأهـ المظبوطـة مآعليهـآ من كلآم المشآيخـة .. خلـّـهم يحللون على كيفهـم .. أهمّ شيّ سمعتي وكرآمتي ومعيشتي مثل بآقي الخلق :)

والنظره الشرعيه ب 500 ريال خير ان شاء الله سلعه هي
يلعـن إمّهـآ دنيآ إللي خلـّـت البلآي ستيشن أغلآ من الحرمـة !!


طيب ما اختلفنا الرجال ما ينلامون
شلون يعني مآينلآمون !! :68:

.
.
.
برآيفـت المسيآر : حآولت أقتنع فيكـ لكن للأسـف :166:



شوكولآيـن .. اللـّـه يطوّل عمرتس ولآيهيـنتس .. لآخـلآ ولآعدم .. وتعيشين وتكتبين يآخآلـة .. وسآمحيني على التأخير :)

[غلا الدنيا]

و اللة بصراحة اهوا شي اساسا المفروض ما يحلل


يعني شنو الرجال لازم يتزوج مسيار



الرجال اذا بصون نفسة راح اعرفة



مو صغير علشان ما يتحكم بغريزتة



و اصلا البنت اساسا الي تقبل كذا تكون رخييييييييييييييصة



و مالها اهل


و المفروض حتى الرجال ما يقبل هالشي


لكن للاسف حللوه رجال الدين


و شكرا لك اخوي



تحيااااتي

[محشش أفندي]

كل عام وانتم بخير
( وجه يتثاوب في الدوام ).... والله يا هو موضوعن خطيرن بالحيل واجدن مرّة..... مرّة وإلا حلتيته كخخخخخخخخخخخخ

أنا أحلق.. أقصد أحلف انتس تمخمخين على مواضيعتس... والله يا عليتس كتاباتن... تخلي الواحد يقرأ موضوعتس أكثر من مرة....
بعدين شوكو يا السيلانية.. وش جاب زواج المسيار على بالتس هاااااااااه :68:

ندرعم بالاقتباسات <<< لعبت فيه العيارة

باختصار صارت مثل الموضه عند الرجال
شوفي هو بصراحه أرخص.. عشان كذا الربع طاحو فيه... مندي موب زواج... اللهم اني صائم..

تعريف زواج المسيار : زواج شرعي تتنازل فيه المراه عن كامل حقوقها لا سكن ولا نفقه واحيانا حتى الاطفال ممنوع واللي تتلقف وتحمل ممكن يوصل في الرجل الامر انه ينكر زواجه بكل بساطه منها .
وش ذا التعريف..؟؟ قصم القصمات... إنك خسفتي به... ممكن سؤال.... هذا تعريف اللغة وإلا الشرع << برا يا كـ_ _ .... اللهم اني صائم
يا ترى مين السبب في رخص المراه معقوله المشايخ ارخصونا لها الدرجه
ايه... لأنهم هم إللي حللوه

مقوله قالتها لي صديقتي انا اشهد انها صدقت تقول لاعاد تستشير شيخ مصري في مسالة فلوس ولا تستشير شيخ سعودي في مسالة زواج
ولا تستشير... شيخ كويتي... بحدود اللبس... ولا شيخ بحريني بحكم الشراب كخخخخخخخخخخخخخخ

يعني المشايخ أي شي فيه متعه لهم وتغيير في الحريم يحللونه على طووول
استغلال للسلطة في المصالح الشخصية.... محد قال مثل الشيوخ اللي يحللون الاسهم

اليوم خبر في الجريده انه الزواج المسيار ب 1000 ريال والنظره الشرعيه ب 500 ريال

طيب وتكاليف الزواج :66:

يعني اللي يفكرون في هالزواج يفكرون في بنا أسره متماسكة ويربون أطفالهم على طاعة الله سبحانه وتحقيق واجبات كل واحد فيهم

شكلك خطابه يا العانس :150:

اعرف لكم شاب في الجامعه بكل وقاحه وقوة عين جاي عند أمه يقول يمه دوري لي وحده مسيار لين أتخرج من الجامعة وأتزوج

ممكن إسم ورقم هذا الشاب اللطيف
يعني حتى الشباب طاحوا فيه
لا تغلطين علينا.... حنا ما نطيح... إلا في الاسهم والجوالات والبخاري
8
8
8
خلصنا من ردود العيارة.... نبدأ... بالرد الرسمي

إن الحمد لله.. نحمده ونستعين به.. ونعوذ بالله من شرور أنفسنا وسيئات أعمالنا....من يهده الله فلا مضل له.. ومن يضلل فلن تجد له هادياً مرشدا << تأثير رمضان

هذا الزواج.... ما فيه إلا خراب... بيوت.... أنا شخصياً جلست مع واحد راح يخطب وحده مسيار... وكيلة مدرسه... بنت قبيلة... قال لي انها قالت له بالحرف الواحد.... شف انت لك يوم الأحد والثلاثاء تجيني للبيت.... وغيره مالك شغل فيني... حتى انها ما طلبت منه مهر.... بس أهم شيء... تتزوج.. << للي يفهمون بس
طالعته قسم بالله بغيت أتفل في وجهه... يا غبي هذي.... تبيك في ذا اليومين... طيب وباقي الايام لمين ؟

يعني يا ناس هذا الزواج... سبب مصاااااااااااايب.... قسم بالله.. فيه أشياء صارت من وراه... ومثل ما قالت العانس شوكو..... ممكن الأطفال يضيعون مدري أبوهم يجحدهم... يعني بالله الشيوخ لما حللوه... ما فكرو بعواقبه.... معقوله.... وإلا الشيء المتعة تحت اسم الدين يحللونه...

بالنسبة للي يتزوج زواج مسيار...

الرجال.... ما عنده كرامه... لأنه وافق ان زوجته ما تكون عنده ولا يدري وينها فيه... ولا يشوفها إلا كم مرة بالاسبوع عشان حاجته... إنسان... ما يعرف معنى الرجولة ولا وش معناة إن حرمة تكون زوجتك وتحت مسئوليته....

الحرمة.... كيف ترضى انها تكون اداة لاشباع الغريزة الجنسية... لها الدرجة هانت عليها نفسها وما احترمتها.... أنا بصراحه هالنوع من الحريم... يطيح من عيني.. لأنه متزوج ثلاث أيام... وأربع أيام لا .. وإلا هي لها غاية معينه ؟؟؟

والله يا شليويح.. انك جبتها لما قلت.. زواج الكفار كخخخخخخخخخخخخخ

شوكو ... سامحيني على التأخير... بس و ربي مشغول....

لا خلى ولا عدم.... ووهـ منـتس بس..... اللهم اني صائم

حـبـتـ:339:ــيـن

[S A R A]

اهلين شوكو قسم بالله يابنت ان مواضيعتس فلله ووناااسه وبدحدر بموضوعتس



((انتشرت في مجتمعنا ظاهرة زواج المسيار يعني باختصار صارت مثل الموضه عند الرجال كل واحد يضيق صدره من حرمته يصك له حرمه مسيار يونس عمره يحسبونها فله ما دروا ان اضراره اكثر حسناته ))

وانتي الصادقه انبسطو هالرجال عليه مافيه خساير والحرمه جاهزه << احس التماسيح بيصفقونها :67: :54:


((وطبعا المراه الي تتزوج مسيار رخيصه أي نعم رخيصه مالها بيت ولا كرامه ولا حتى تقدر تقول وين رحت ووين جيت))

الحرمه اللي ترضى بهالزواج انا اشهد انها بايعه الدنيا بنص ريال وربي الحرمه كرامتها وعزه نفسها اكبر من انها تبيع نفسها لزواج مثل تسذا الله لايبلانا
((يا ترى مين السبب في رخص المراه معقوله المشايخ ارخصونا لها الدرجه

مقوله قالتها لي صديقتي انا اشهد انها صدقت تقول لاعاد تستشير شيخ مصري في مسالة فلوس ولا تستشير شيخ سعودي في مسالة زواج ))

شوفي حبيبتي المشايخ ماحللوه الا لاسباب واكيد اجازوه عشان شافو الناس متجهين لشي اعظم منه مثلا

((يعني المشايخ أي شي فيه متعه لهم وتغيير في الحريم يحللونه على طووول ))

لاياقلبي موب كلهم حرام الواحد يقول اشياء ويستاثم فيها وتاكدي ماحللوه المشايخ الا لاسباب قويه

ونا برايي هالزواج موب زين ابد يعني الرجال كل شوي معرس على حرمه ومطلقها والا الحرمه اللي كرامتها بالارض بسبه هالزواج وربي اصير عانس وتطيح ضروسي ولا اعرس مثل ذا العرس :54:

يعطيك العافيه شووكووو على هالمواضيع اللي تصطل <<< كلمه توها متعلمتها من اخوانها :55:

ولايحرمنا من فيستس ياحلووه.....

[المطيوره]

باك ينطح باك


تعريف زواج المسيار : زواج شرعي تتنازل فيه المراه عن كامل حقوقها لا سكن ولا نفقه واحيانا حتى الاطفال ممنوع واللي تتلقف وتحمل ممكن يوصل في الرجل الامر انه ينكر زواجه بكل بساطه منها .


يعني اللي تاخذ مسيار ماتستفيد شي غير مقابل وجيهن ودره

تتلقف وتحمل ليه الحمل صار لقافه وانا اقول وراني مطيوره اثر امي متلقفه ههههههههههههههههه

عليتس اسلوب ياشوكو وربي يفطس ضحك شوفي كيف تطرحين ذا الجمله

واللي تبي تخون نفسها وتحمل يتنكر لها الرجل ويمسح بها الارض <<< شوفي الطرح بس


الشيخ بن باز الله يرحمه ويغفر له ما انكر انه حلل هذا الزواج بس لفئه معينه وتحت شروط معينه

انا مره قريت عن قصة وحده وكانت اسبابها مقنعه للمسيار بس ماتصير قدوه للبنات لان كل شخص له ظروف

ومحيط اسري يختلف من شخص لشخص وانا مع الحالات الخاصه وباسباب مقنعه

زي زوجه فقدت زوجها وعندها اطفال وماتبي ترتبط بانسان يصير له حقوق ويطالبها بها ويبعدها عن اطفالها

او انه يسبب لفرقا بينها وبين اطفالها او انسانه تمر بظروف عندها اب او ام مريضين وماتقدر تعطي الانسان

من وقتها لانها مشغوله بمن هم اهم وتبي تصون نفسها عن المحرمات


اعرف لكم شاب في الجامعه بكل وقاحه وقوة عين جاي عند أمه يقول يمه دوري لي وحده مسيار لين أتخرج من الجامعة وأتزوج زي كل خوياي يعني حتى الشباب طاحوا فيه

هذا ودك ان امه شلخت ظهره بالعقال اللي عالى راسه اذا كان لابس ومسوي رجال بالزواج اجل بنات الناس

تسليه ولعبه لهم

شوكولاين الناس ميب زي بعض تحكمهم معتقدات وظروف واجواء مختلفه عن اللي يعيشها غيرهم

فما نقدر اننا نكون ضد زواج المسيار لانه حل مشاكل كثيره بالمجتمع وصح ان بعض الناس استخدموه

لسد مطامعهم وشهواتهم وخلوه مثل مايقول المثل تعبر باام الشوشه لين تجيك المنقوشه

شوكولاين اشكر لك طرحك لقضيه جداً مهمه في حياتنا وانا قلت رايي واتمنى انكم تتفهمونه

تشاووو

[شوكولاين]

العذر والسمووحه اخواني واخواتي الاعزاء على تأخري بالرد >>> يا زين الذرابه لا صارت الوحده صايمه :62:


اقوووول لا يكثر عااد انا بدرعم باول شخصه ردت لبا قلبها وقلب اللي خلفوها :84:


مط مط ولكم يا بعدي >>> فاهمه غلط الاخت


كل ماشفت مطوع قلبي تلوع موب من زينه لها مآرب اخرى لم اعلم بها حق علمه


منهي مارب هذي مااعرفها بالله مط مط ممكن تعرفيني عليهاا >>> يا ربيييييييه



انا احتريتس يا بعدي


لا تبطين علانا

[شوكولاين]

اهلين وسهلين بنور العين


كيفك نعوسه خاانم >>> يالبيه يا باب الحاره بس


غررريبه من البنت اللي بترررضى بهذا الزوووواج <<<< رخيييصه زي ما قلتي اختي شووكو
شوكو يعطييك الف الف عاافيه على المووضوع


لا تستغربين شي يا بعدي الدنيا تخوف العالم مررعبه برا صكي باب بيتكم ولا عاد تطلعين >>> خير في شيكاغو


لكن معك فعلا شي يشيب الراس هالزواج اللي قاهرني ان له انصار ومويدين واغلبهم بعد من اهل اللحا يعني المفروض يحقوون العدل فينا ويفكرون فينا زي ما يفكرون في متعتهم



لكن وش نقول هذا حال المراه بهالديره يظلموونه باسم الدين والله ان الدين كرمنا وضمن لنا حقوق وواجبات
واللي يصير لا يرضي رب العالمين ولا نبيه محمد الطاهر الامين

[شوكولاين]

شوكو يابعدهم انتي

اول شي لتس وحشه وادري ادري اني مقصره وقاطعه


اي والله لتس وحشه يا القاطعه يالمروحه ياللي ما تستحين على وجهتس >>> مهيب مثل حوستي خخخخخخخ


ثاني شي كنتس تقرين افكاري يابنت كان هذا الموضوع في بالي


ايه ايه انا اقرا افكارتس منذو مبطي ما اقول لتس انا وانتي بينا ارتباط ذهني مدري عقول مدري وش يسمونه



يسمنوووووووووووووو ياقلبي

وهذا تثبيت لعنونتس ياحبي


ميرسوووووو ميوسوووووو يا المعزبه ما قصرتي على التثبيت جعلني ارقص بعرستس يا رب



مسموووسه نحتريتس يا بعدتسبدي



جعلني ما خلا منتس قووولي اامين

[رقــيــق المــشــاعــر]

ياهلا شوكولاين وياهلا بالمواضيع السنعه


بصراحه انا قريت قبل فتره وجاني كلام من اكثر من شخص ان المشايخ حللوا المسيار


انا بالدايه تفاجات ولما قريت بعض المقالات مان تفسيرهم ان زواج المسيار قد يكون افضل من العلاقات


الغراميه اللي تصير بين الشباب والبنات <<بالله وش هالتفسير

ويقول بعض المشايخ ان هالشي بيخفف الضغط على الشاب السعودي من ناحية الكلفه بحيث

انه اذا تزوج مسيار قد ينعجب بالمراه ويرتبط فيها بزواج شرعي ويكونون عائله

ياعيني على الهدف السامي اللي عندهم....


بالمختصر المفيد حنا كل مالنا ونفتح شوي شوي واخرتها بنصي حالنا حال مصر ولبنان ......

المشكله ان ي ناس يشتكون ويعارضون ويرفعون ضغطهم على هالقرار اللي صدر من المشايخه

بتحليل زواج المسيار لكن الشي المهم ان المشايخ ما اجبروا الناس على الزواج

يعني قصدهم اللي يبي يتزوج يتزوج واللي مايبي حر....

وللاسف هالشي بيفتح باب لبنات كثير ممن فاتهم باب الزواج ويريدون يجربوا كيف تكون الحياه

الزواجيه لكن للاسف راح تكون بمفهومها الخاطيء وهو زواج المسيار....

ومع الوقت راح تشيع الفتن في كل مكان

لكن الله يجيرنا منها ويكف عن شر العباد وشر المفسدين<<مايقصد احد



مشكوره اختي شوكولاين


تحياتي

رقيق المشاعر

[شوكولاين]

سلآم يآ إبـن بآز ويآإبـن عثيميـن ..


حياك الله وبياك يا مفتي عام المملكه مو انت اللي تصلي بالناس في مسجد المعيقليه وانا اقول وين شايفتك اثرك غاطس وسط الهنود بس انا ميزتك عنهم بريحة اللي تصرع خخخخخخخخخ




لكن إللي أعرفـة وفآهمـة إنـّـة كلمـة الزوآج حرآم يطلقونهـآ عليـة .. لإنـّـة وبمعنـى أصـحّ خليط من الوقآحـة والدنآءهـ والإنحدآر الفكري والذلّ


يا عرب احد يصكني كف يصحيني >>> متعوده على الكفوف

ابكم اللي يهرج هذا صدز شليويح والا انا احوليت يا رقااله


اثرك ذرب وتعرف تصف هرج يا ولد والله منت سهل
المهم

صح لسانكـ شليويح انا اشهد انك جبتها يا القرم


أجل وحدهـ مآ أعرفهـآ ولآتعرفني إلآ في الفرآش والسآمعيـن بكرآمـة !


اهنيكـ يا بعدي على الاسلوب الحواري الراقي خخخخخخخخخخخخخخخخخ



المشآيخـة مآلهـم دخل .. حنـّـآ نعتب على المشآيخة في عدم التبيين والإيضآح علشآن مآيصير لأي وآحد ووحدهـ عذرٍ

مالهم دخل؟؟؟ ومين فتح لنا باب المسيار وبلاويه طيب هم بينوا المحاسن ووضحوها لضعاف النفوس بس

ما قالوا يا نااااس ارحموا الحريم من ظلمكم


يلعـن إمّهـآ دنيآ إللي خلـّـت البلآي ستيشن أغلآ من الحرمـة !!

ههههههههههههههههههههههههههههههههههه يا حليلك يا شليويح رهيييييييييب



شلون يعني مآينلآمون !!

انا اقولك ليش ما ينلامون لانه طول الله عمرك والسامعين اجمعين كيف الحال ( وجهن يقول خل محشش يشرح لك ) انت صح كمخه وما تفهم بس هذي بتفهمها على طووووول


برآيفـت المسيآر : حآولت أقتنع فيكـ لكن للأسـف

حتى هو مااقتنع فيك ياخي مدري ليش


شوكولآيـن .. اللـّـه يطوّل عمرتس ولآيهيـنتس .. لآخـلآ ولآعدم .. وتعيشين وتكتبين يآخآلـة .. وسآمحيني على التأخير

ابدن ماجا منك قصور وانا خالتكـ لا هنت يا بعدي

[شوكولاين]

برايفت للباقين ماعليه وانا اختكم اللحين بروح اخمد وغدن ان شا الله اخمخم الردود


اشكركم من اعماق قلب قلب امي اللي جابتني


وربي ان ردودكم وتفاعلكم للموضووع فرحني بس باااقي اثنين من الاعضاء المهمين ما ردوا مدري ليش


كيف الحال ابو رجه بيكـ



يالله عن اذنكم وخشومكم بعود لكم ان شا الله

[ناعسة الطرف]

ومويدين واغلبهم بعد من اهل اللحا <<< يمكن قصدهم ان الزواج الرسمي فييه غلااء المهور .. وراحو الله يصلحهم وأيدوو زوااج المسياار <<< هاذي وجه نظري .........والله اعلم

[الملسووونه]

زواج المسيار اختلف الناس في تسميته فـ المتحمسون له سموه
(زواج الشطار ، الأخيار ، المسيار)!!
والكارهون له سموه (الإنهيار ، الإنفجار ... إلخ)

ولكن مهما اختلف الناس على تسميته الا انه يؤدي الى نفس المعنى
ومهما اختلف مسماه الا انه موجود من قبل ولكن كثر الكلام عنه في
الآونه الأخيره بعدما أجازه العلماء عند اكتمال شروطه واركانه بعد
ان كان البعض يحلله والبعض الآخر يحرمه والبعض يراه مشبوه وغير
إنساني والبعض الآخر يراه حل لقضايا ومشاكل بعض الشباب والفتيات


زواج المسيار في نظر الرجال :

زواج المسيار ساهم في حل مشكلات بعض العوانس والأرامل والمطلقات
وصاحبات الظروف الخاصه ...
فـ سلبيات هذا الزواج ليست محصوره عليه فقط وانما تحصل مشاكل
اكثر في الزواج العادي منه في زواج المسيار ..

زواج المسيار إجازته لاتعني فرضه على الرجال والنساء وإنما تمت إجازته
من باب التيسير ولمن هم بحاجه له مثل :

1- أرمله خافت على نفسها من الفتن وتحملت مسؤولية تربية اطفال

2- فتاة فاتها قطار الزواج لسبب من الأسباب اما كانت تعول
اهلها او تربي اخواتها الايتام او اياً كان سببها

3- امرأه اعمال لاتستطيع تحمل مسؤوليه بيت وتربية اطفال

فـ يرا الرجال وعلماء الدين ان الحل هو زواج المسيار !!

واستشهد البعض بإحدى زوجات النبي (مايحضرني اسمها نسيته)
لما تنازلت عن ليلتها لعائشه رضي الله عنها ولم ينكر ذلك الرسول بل أقرّه ..


ولكن البعض استغل إجازة هذا الزواج لتحقيق مآربهم فـ منهم من
يتزوج فترة لغرض معين ويشترط عليها عدم الانجاب ويأتي لها
متى سنحت له الفرصة ثم يملّ منها ويتركها بكل بساطه !!
ويتنقل من امرأه لأخرى (لانه يتزوج بالمجان وش وراه ؟)
بدون خسائر ومسكن وهو زواج غير موثق فيسهل الخلاص منه بكل بساطه !!

فـ رجال من هذا النوع لا نراهم الا جبناء وتكون نظرة الناس لهم
نظرة استحقار ....


اما زواج المسيار في نظر المرأه :

زواج المسيار سبب في ضياع حقوق المرأه وكثرة حالات الطلاق
وتشرد الأطفال وفيه استغلال لوضع بعض النساء لتحقيق أغراضهم الشخصيه
دون مراعاة لمشاعر المرأه وعلى حساب كرامتها وتهديد لمستقبلها بالطلاق ...

سؤال !!
لو المرأه تحقق لها الزواج العادي هل ستوافق على زواج المسيار؟
طبعاً وبكل تأكيد لا ...


كذلك كانت آراء اغلب الفتيات عندنا بالسعوديه
العنوسه ولا المسيار ....



انفتاح زواج المسيار بهذه الصوره الكبيره دليل على انتشاره بشكل كبير
انا اشوف انفتاحه يشكل خطوره كبيره على المجتمع ومنها عزوف الشباب
والبنات عن الزواج العادي (وهذي لحالها مشكله اكبر واخطر من زواج المسيار)

لم نسمع حديث عن الرسول يذكر فيه زواج من هذا النوع ولم يأتي به
ديننا ولكن كان هذا الزواج إجتهاداً من مشايخنا لتحصين الرجال من
الحرام ولكن على حساب كرامة المرأه وهدر حقوقها !!



في النهايه ما أجمل السعادة بين الزوجين لو تمت في حب ووئام وبمباركة
الجميع لأن الحياة سوف تنتهي يوماً وياسعادة من يخرج منها كسبان ...

ماأجمل الحياة المشتركه بين محبين خططوا ورسموا معاً لمستقبلهم ...


أيها الرجال اتقوا الله في النساء فهم أمانه فحافظوا على تلك الأمانه
وسعاده دائمه لمن يعرف التعامل مع أرق البشر وأطهر قلب
وأطول لسان :1:



شوكولاين موضوع مهم وجريء كنا بحاجه لطرحه ومناقشة سلبياته وايجابياته
لأنه فعلاً زواج المسيار ظاهره تفشت في مجتمعنا في الفتره الاخيره
بشكل كبير ورهيب والمشكله من رائي انا ليست في زواج المسيار
نفسه المشكله فيمن يتعاطى هذا الزواج من شباب وبنات بإسم الزواج
وانه حلال وأجازه العلماء ..!!

شوكولاين معودتنا يالغاليه على طرق المواضيع الجريئه دائماً
وسردها بطريقه مشوقه تشد القارئ لقرائة موضوعك اكثر من مره :286:


آسفه على تأخري في الرد وأتمنى يكون ردي يستاهل التأخير :1:
واتمنى اضفت لو القليل لموضوعك ولو انه مايحتاج ماشاء الله :286:


تقبلي مروري وردي

أختك : مس مس

[بقاياحزن]

لا تقرورون انتم من انفسكم اجازوه المشايخه لانه في كثير من بناتنا يبن الستر وهذا نوع من الستر
انا في وحده من قريباتي تزوجت مسيار مو عشان شي بس تبي الستر والذريه الصالحه لان عمرها عدى الاربعين
الي يبي الستر مو معناها انها رخيصه لا لاتفهمون غلط الدين يسر مو عسر فهمتوا
وانا اقوولكم انه طايحين فيه ارجالنا شلف لا والله موضه بس نقوول الله يعين والله يوفقنا وياكم
تقبلوا تحياتي