ديوانية مراجيج © - قوانين التسجيل

قوانين ديوانية مراجيج ©

قوانين التسجيل

لتتمكن من متابعة عملية التسجيل , فيجب أن تقوم بقراءة القوانين التالية ثم الموافقة عليها:

بداية

بســم الله الرحمــن الرحيــم
بإسم ربي ابتدينا ., في هالصفحه رسالة , مانبيها تنطوي غير لمن نتفق عليها , وبعد ما أخذنا الآراء من أغلب الأعضاء وبعضهم أخذناها من مواضيعهم في الشكاوي والإقتراحات ـ ونبي نقول لكم حاجات هي من حقنا وحقكم ومن حق كل من كتب حرف في ديوانية مراجيج © ـ وهذه الصفحه ستكون الاتفاقية بينا وبينكم وبين الزوار .

بداية تعريفية بالموقع

شبكة ديوانية مراجيج , أسست في عام أوائل 2005 وكانت البداية فقط بمجلس حوار " منتدى " وبتسجيل مجاني وصفحات مفتوحه للزوار وليست ولا نجبر أحد للتسجيل رغماً عنه من أراد التسجيل فمرحبا به , وتحمل الديوانية كوادر يفخر بها من دكاتره و مهندسين وإعلاميين وصحفيين وطلبه و أطباء ورجال أمن ..... إلخ , ولله الحمد مع مرور الوقت تمت أضافة برمجيات بأنواع مختلفه كـ مجلة شامله وتحوي بطاقات , صوتيات ,. أخبار الموقع , ترجمة ,وأضافات رائعه نادرا ان نشاهدها في المواقع العربية . ونفخر بما تطورنا له ونطمح للأفضل , بالتعاون معكم نرتقي للمواقع العالمية .

دستور ديوانية مراجيج ©

" قَالَ يَا قَوْمِ أَرَأَيْتُمْ إِنْ كُنْتُ عَلَى بَيِّنَةٍ مِنْ رَبِّي وَرَزَقَنِي مِنْهُ رِزْقًا حَسَنًا وَمَا أُرِيدُ أَنْ أُخَالِفَكُمْ إِلَى مَا أَنْهَاكُمْ عَنْهُ إِنْ أُرِيدُ إِلَّا الْإِصْلَاحَ مَا اسْتَطَعْتُ وَمَاتَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ " سورة هود

البند الأول

الدين النصيحه , يمنع وضع صور مخلة بالآداب الإسلامية في الصوب الرمزيه أو في التواقيع أوالصور الرمزية أو الصور الشخصيه , كذلك في المواضيع والردود , وهذا ليس بشرط عليكم من ديوانية مراجيج © بل هذا ما يحثنا إلية ديننا الإسلام ولا نريد أن نخيب ظن شريعتنا بما لدينا من دين وعلم , ولانريـد لمن يخطيء التكرار بذلك . واللي مستانسه بصبعها وكل شوي مصوره شي منه , تحشمنا ماهوب حنا اللي لنا هالمناظر .

البند الثاني

الأغاني , "ومن الناس من يشتري لهو الحديث" , كلمــة كبر السما (( مانبي أغاني )) ,فيه مواقع متخصصه للأغاني مانبي ذنوبكم تتانقل مابينكم وبين غيركم , الشيطان ماهوب أشطر منكم ولامنا . وصدوقني لو فيـه فايدة كان أول واحـد يحطها لكــم انا ماهوب أنتم وكان فتحت لكم قســم أغاني وريحتكم آخر راحـة . يازين القرآن والأناشيد , ويازين القصايد .
وهالبند يمنع المواضيع المنقوله والغير هادفه واللي ماتسمن ولاتغني من جوع .

البند الثالث

التميلح " ياعيني " ( وجهن يسعبل ) وله أنواع بنقولها بعد شوي , قصة حقيقيـه وصارت في الموقع , مره كان فيـه ثلاثـه أو اربعـه أخويا هنـا وكل واحــد يمدح في الثاني وشغـالين على آخر حلاوهـ , والمشكله مواضيعهم ماندري وش تبي , مرهـ واحد منهم كتب موضوع يمدح فيـه أبو فلان خويـه , طيب ياليته كاتب قصيـده على الأقل نفهمها عدل " ناسـ(ن) ماتستحي " , المهم ان كل واحد يمدح في الثاني , أنا في بداية الأمر راح بالي على انهم بزرنجيـة لكـن التخطيط في الماسنجر أو الجوال اللي يخططونـه غير , أثاريهم طايحين تشبيك في الرسايل الخاصـه وماحولك أحد وكل هالمواضيع اللي ينزلونهـا على بعض وقوة المدح كلها إستعراض عضلات أخلاقيـا جنب اللي مطاوعينهم , وكل ساقط له لاقــط . مع مرور الوقت جاتني شخصيـا شكوى بأن العضو الفلاني مزعجها رسايل خاصه , وياقلبي وياعمري ويا خلف الكل انتي , المهم شغل تميلح , غصب طيب يبي يشبكها ماعرف , مايدري أن البنت هذي اشتكت عليـة (أخوياه الثلاثـه مع التحذير كل واحــد هجد وبعضهم صاروا محترمين , أما واحد منهم للحين داشر والله لو يربي لحيته كيلو
تحت , داشر داشر ) المهم راسلته وقلت له يابو , عيب عليك وجيته بإسلوب شباب وعطيتـه على جوهـ وقال إبشر , يومين إلا هو مرسل رساله لها بصورته الصدقيـّه وأرسلها لها ( حلايا هالوجه ) المشكله لو اني مطاوع صورتـه الرمزيـة كان قلت يشبه فزاع , حولت لي الرساله وقالت هذا فلان بن فلان الفلاني وهي بنت خالتـه . شفتوا العقوبـه الطازجــه , إبتلاء سريع قبل لا يسوي أي شي أكتشف مر الحقيقه قبل لا يغازلها . ,, خلونا نكون واقعيين ,بنتن ماتبيك وش تبي تلاحقها , في مواقع كثيرهـ أنواع الغزل فيها رح شف لك غير هالمكان , والعكس للبنت كذلك .
أتقوا الله حق تقاتـه . شف لك حرفه في النت إستفيدوا منه فيـه ذهب وفيه علم غير العالم اللي حنا عايشينه , لايفوتكم شي فيـه . تعلموا إدرسوا , مافيها شي , محاكيكم متعلم الفتوشوب والفلاش والسويتش ماكس من النت ماحدن جا وحط يده على الماوس حقي وقال سـّو كذا وكـذا . اتابع في هالدروس وكل يوم أتعلم . أنا احسن منكم ؟ لا والله فيه اللي أحسن مني ومخبي طاقته لغيره ماهوب له يفيد نفسه فيها .

ومن هالبند نبي نوضح لكم [ الرسائل الخاصه ] مراقبة , اللي بيلعب يلعب بعيد عنا , حنا ناس أكبر من كلمة غزل .

البند الرابع

أكتب موضوع يليق بمقامك لأن قدركم كبير عندنا وماهوب صغيـر , وإتركووا المواضيع المنقوله , واتركوا المواضيع اللي ماتهدف ولاتفيد في شي مجرد عنوان وحروف بلا معنى .
وهالبند يمنع المواضيع المنقوله والغير هادفه واللي ماتسمن ولاتغني من جوع .

البند الخامس

هناك مواضيع طاحوا فيها وهي رفع عريضه للموقع الفلاني وجمع مليون إيميل علشان يقفلون الموضوع الفلاني !! معقوله موقع يشوف شي غلط مايحذفه بدون هالطلب الماصل ؟ او مثلا يجيك موضوع واحد يكتب تم اختراق موقع الفلاني ( وش استفدنا ) ؟ خله يخترق , وأيضا هنـاك مواضيع وهي نشر للصور ونشر لما يعمله بعض الكفار في ديننا الإسلام , يحرق القران يسب الرسول وغيرهـ . طيب لمن نشوف مايسوونه , شي جديد ؟ لا ماهوب جديد , كان للرسول جار يهودي يحط الشوك والقمامه على باب بيته ’ يعني هالشي من ايام الرسول يسوونه ماهوب شي جديد , المشكله ان بعضنا يردها بالسب واللعن والإسلوب الماصل جداً , طيب بتقولون ليه ياديوانية مراجيج خلنا نوري الناس شلون الغرب والكفار يسوون لنا في الوقت الحاضر , ردي لكم بسيط بسطور من سماحة الشيخ عبدالرحمن السحيم حفظه الله , هي فتوى منه بهصوص نشر الصور على سبيل المثال صور الكاركتير اللي الكل مسوي أقسام لها في منتدياتهم وكل يوم واحد جايب صوره وحنا مطاوعينهم ,
الفتوى :
هذه فتوى صادرة من الشيخ عبدالرحمن السحيم حفظه الله تعالى لنشر رسومات الصحيفة الدنماركية المسيئة لرسولنا الكريم بين المسلمين .
قال الشيخ عبدالرحمن السحيم حفظه الله تعالى/ نشر مثل تلك الصور كُـفْـر بالله ، واستهزاء برسوله صلى الله عليه وسلم .
ولا يُسوِّغ نشرها كون الإنسان يُريد إنكار ذلك المنكَر ، فإن العلماء نَصُّوا على أن إنكار المنكر يجب أن يكون بلا مُنكَر . أي أن الذي يُريد إنكار مُنكَر لا يرتكب مُنكراً آخر أعظم منه ، ولا مُساوياً له .
فلو أن إنساناً رأى جريمة زنا وأراد أن يُحذِّر الناس منها .. فهل يَسُوغ له أن ينشر صور تلك الجريمة بحجة إنكار المنكَر ؟الجواب : لا، وجريمة الزنا تتعلق بِعرض إنسان مسلم .
وتلك الصور تتعلّق بأعظم إنسان وبأشرف وأفضل مخلوق ، وهو محمد صلى الله عليه وسلم،، بل تتعلّق بِدِين الله وبأمة الإسلام جمعاء .
فكيف تَطيب نفس مسلم يؤمن بالله واليوم الآخر أن ينشر مثل تلك الصور البشعة ؟ وسَماع ما قيل عنها يُصوّر بشاعتها .. وفي سماع خبرها كفاية عن رؤية صُور آثمة مُجرِمة ..
فلا يجوز نشر تلك الصُّوَر القذرة .. ويكفي في استثارة مشاعر الناس القول ووصف ما صدر من تلك الصحف الكافرة المجرمة .
ولا يُعذر الإنسان في نشر تلك الصور كونه حَسن النية أو سليم الْمَقْصِد .وعلى من نَشَرَها أن يقوم بمسْحِها .. وأن يستغفر الله مما فَعَل ، ويتوب من ذلك .

والله تعالى أعلم .

يعني هالبند يقول ( ممنوع منعا باتا وضع صور تستهر بالدين بأي صفه كانت , مثال : كاركتير سب الرسول اللهم صلي وسلم عليه .) .

البند السادس

تبي تكتب شكوى ’ ماعندك أي مشكله أكتب شكوى , حبيبي حنا ماصرنا في قسم [ من هنا نستمع إليك .. ] الا لخدمتكم , لكن الدستور الجديد عيـّـن عضويات مختصه للحلول والمشاكل , ويتم المخاطبه بأسم العضوية بشكل رسمي , ليه سوينا كذا ؟ أول شي نسوي تغيير ثاني شي دعابة وحلاوتهاا في فكرتها وفي رسميتها , يعني تكتب خطاب لديته ونهايتة رسمي ولكن محتوى عياري أو محتوى فيه نوع من العصبية بيكون وضعه مختلف , حتى لو انك جاي معصب راح تهدا شوي , وبكذا راح يكون كتابة الخطاب بالشكل الآتي . إدخل على قسم من هنا نستمع إليك وإكتبها . , بالإضافه الى ذلك راح يكون هناك قسمين , قسم [ من هنا نستمع إليك .. ] الحالي لايرى الموضوع الا كاتب الموضوع والإدارة , والقسم الثاني مفتوح [ المحكمة ] وإذا صارت فيها مشكله أو شي مايصلح انه يكون أمام جميع الأعضاء ينقل الى القسم [ من هنا نستمع إليك .. ] .

يعني البند السادس إسمه ( اقرا اللي فوق وتعرف )

البند السابع

لكل قسم شروط ولكل إداري صلاحيات ونشاطات . تابع شروط القسم بإستمرار لكي لا يتم نقل أو حذف موضوعك .

البند الثامن

السوالف عن الطوائف [ سنـّـه وشيعـّـه ] , خلوها لأهلها ماهوب لك ياسني ولا لك ياشيعي , لاحد يسوي فيها مفتي على الثاني ويفتح نقاش هو ماهوب أهل له , فيه مشائخ مهتمـه بالسوالف هذي , إللي يبي يفتح السوالف هذي يخاطب طرف من المذهب اللي يبيـه , وكل واحد يستضيف له شيخ ملم بالأمور ويتناقشون . هذا اذا وافق كلا الطرفين ولازم تبلغ الإداره قبل أي شي علشان يترتب لها بشكل رسمي .

البند التاسع

الرحمه على القوي والضعيف , والعقاب على القوي والضعيف , على الأخ والصديق ( ولاحد يزعل ) اللي مايبي ينحرج معي وخصوصا ربعي وأقاربي بيضوا وجهي يتبيض وجهكم سودوا وجهي يتسود وجهكم . انصفنوني وأنصفكم , أتمنى مراعاة هالبند . الى الاعضاء عامة أقرب مثال ,’ ماراح نخلي واحد ونتجاهل واحد ليش انه قريب او انه راعي سمعه عاليه , الغلط غلط مهما كان , الدلع اللي كان مستانس عليه كم واحد هنا وكم وحده ( زال ) وانتهى من بعد وجود هالصفحة .

البند العاشر

العلمانيين ( لهم طريقهم الخاص في الانترنت ) الموقع لا يرحب بهم بتاتاً .

البند الحادي عشر

أي عضو يدعم الإرهاب بأي طريقه من الطرق ويحاول دس السم في وسط الأعضاء ـ سيتم حذفه وليس ايقاف العضوية ,’ وتسليم الـ Ip الفعلي الى الجهات المختصه .

البند الثاني عشر

أي شخص يحاول الاستهزاء ويتعمد سوء التعامل أو الإستهزاء بالأعضاء بشكل مباشر أو غير مباشر، أو يعتمد نرفزة الأطراف الأخرى المشتركة في النقاش أو في موضوع معين ، سجن ديوانية مراجيج ينتظره , خمس نجوم .